ADEM ZAPLLUZHA -TRI POEZI

nga **Agim Gashi** Sun Oct 07, 2012 10:17 pm

ADEM ZAPLLUZHA -TRI POEZI

SONTE ÇDO GJË DËNES

Nuk di
Por atë çasti
Kur në zemrën time
Rrinte një grusht erë
Në pasqyrën e mendjes
Binte një shi i zi

Një fëmijë dëneste
Qante edhe loti i gurit
Qanin rrapet
Ato të vjetra të pathyeshme
Dhe ato që sapo kanë nisur
Të qesin filiza

Kështu kjo ditë
Zbriti nga kapela e ime
Dhe është duke cijatur
Me zogjtë e fëmijërisë

Sonte çdo gjë po qan
Si ky shi i vjeshtës
Qajnë lisat
Dënesin duart e thyera të rrapeve

VETËM NJË QEN I VETMUAR

Ti mbete tej kujtesës
Kur frynte era
Ikën gjethet nga degët
Asnjë zog shtegtar
Nuk fluturoi në mendjen time
Ishte dita e parë e harresës
Kur ne loznim me erën
Duart e njoma të lisave
Mbetën diku mes gjetheve
Dhe mallkimi na hyri shpirt
Kur era iku me stinën

Nuk mbaj mend asnjë tregim
Por ti më folje
Diçka si në ëndërr
Për qenin e Slabinës
Më beso
Vetëm ajo lehje e llahtarshme
Më është ngulitur në tru

Në këtë natë të hidhur
Lehin edhe yjet
Assesi nuk ndalen mjegullat
Vetëm një njeri i vetmuar
I shikonte meteorët me bisht
Kah shkundeshin
Në syprinën e Jonit të dhunuar

ISHIT

Mes dallgëve ishit
Malësorë deti
Dhe asnjëherë nuk e ndalët këngën
Për ringjalljen e zanave

Sa herë që hytë në legjendë
Dolët faqebardhë andej valëve
Nuk thanë kot
Se jeni detarë mali

E deshët ujin
Si hijen e rrapeve
Në mendjet e juaja herë lulëzonte mali
E herë gjallonte qielli

Mes fjalëve ishit
Zogjtë e “Kanunit të përkitur”
Nuk di kë e deshët më shumë
Atdheun apo ringjalljen

Nga libri me poezi
“Sonte çdo gjë i përngjan lotëve”

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30