"25 milionë dollarë për kokën e Bashar al Assadit"

nga **Agim Gashi** Tue Sep 18, 2012 7:57 pm

"25 milionë dollarë për kokën e Bashar al Assadit"

Kryengritësit sirianë të Ushtrisë së Lirisë përgënjeshtruan ditën e martë raportimet se ata kanë vendosur një shpërblim për këdo që do të dorëzojë të gjallë apo të vdekur presidentin e vendit, Bashar al-Assad.
Megjithatë, ata konfirmuan se një ofertë e tillë është bërë nga një grupim tjetër opozitar, i paangazhuar në bllokun kryesor të rebelëve.

Në një lidhje telefonike nga Turqia për “CNN”, zëdhënësi i Këshillit të Lartë të Ushtrisë së Lirisë Siriane, Louai Miqdad, deklaroi se: “ULS nuk ka lidhje me grupet siriane në opozitë në Egjipt, të cilat e quajnë veten gjithashtu si ne dhe që kanë vendosur një shpërblim prej 25 milionë dollarësh për kokën e Assadit”.

Ishte Agjensia Turke “Anadolu” e para që publikoi lajmin për shpërblimin, duke saktësuar se shuma është vendosur në dispozicion nga një grup biznesmenësh sirianë, të paidentifikuar për arsye sigurie.

Prej një viti e gjysmë, Siria është përfshirë në një luftë civile të përgjakshme, që i ka kushtuar jetën 28-35 mijë sirianëve, ndërsa ka shpërngulur nga banesat e tyre mbi 1,5 milionë banorë.

Në fillim të protestave në mars të vitit të kaluar, që filluan me kërkesën për dorëheqjen e Assadit, ky i fundit refuzoi largimin nga pushteti që e trashëgoi nga i ati në vitin 2000, dhe përgjigja e tij ishte shtypja me dhunë e revoltës popullore.

Tani pas shumë muaj luftimesh, raporti i fundit i Këshillit të të Drejtave të Njeriut në OKB, fajëson të dyja palët ndërluftuese si përgjegjëse për krimet e luftës dhe egërsinë me të cilën po luftohet në vend.

Sipas raportit në fjalë, të dyja palët konsiderohen “përgjegjëse për masakra mbi civilë, mosrespektimin e ligjeve të luftës dhe ekzekutimin pa gjyq të ushtarëve të dorëzuar apo të kapur rob”.

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31