Promovohet libri me poezi 'Gorgonë'

Promovohet libri me poezi 'Gorgonë'



“Gorgonë” është libri më i ri me poezi i autores Blerina Rogova-Gaxha, i cili u promovua dje në ambientet e Bibliotekës Kombëtare dhe Universitare në Prishtinë. Në këtë promovim, përveç autores së librit, të pranishëm ishin edhe emra të njohur studiuesish të letërsisë sonë si Prof. Sali Bashota, njëkohësisht drejtor i Bibliotekës Kombëtare dhe Universitare, Prof. Rrahman Paçarizi, Ma. Flamur Maloku dhe Ma. Agim Apolloni. Libri u cilësua si mjaft i veçantë dhe i realizuar me një nivel të lart profesional.
Sipas të pranishmëve në këtë promovim, “Gorgonë” paraqet realitetin social dhe rrethanat aktuale, fenomene të cilat autorja me një mjeshtëri të theksuar artistike, ka arritur t’i realizojë dhe t’i paraqes para lexuesit në formë të vargjeve.
Përveç këtij libri poetik “Gorgonë” autorja Blerina Rogova-Gaxha, është e njohur gjithashtu përmes shkrimeve të ndryshme kryesisht artistike, të cilat në fokus kanë ngjarjet aktuale në vendin tonë. Libri “Gorgonë” i Blerina Rogova-Gaxha, është botuar nga Shtëpia Botuese “Rozafa” në Prishtinë.