Me manifestimin "Ora Përkujtimore" u shënua 10-vjetori i masakrës së Reçakut

Me manifestimin "Ora Përkujtimore" u shënua 10-vjetori i masakrës së Reçakut

Prishtinë, 15 janar - Sot në Shtime me manifestimin "Ora Përkujtimore" u shënua 10-vjetori i masakrës së Reçakut, kur më 15 janar të vitit 1999, forcat serbe në fshatin Reçak, vranë 42 civilë shqiptarë. Shefi i atëhershëm misionit verifikues të OSBE-së Uiliam Uoker vrasjen e këtyre civilëve e vlerësoi si masakër. Kjo ngjarje ndërgjegjësoi botën demokratike për krimet serbe në Koosvë dhe përshpejtoi ndërhyrjen ushtarake të NAT0-s Ky është viti i parë që Reçaku po përkujton këtë ngjarje tragjike në Kosovën e pavarur. Presidenti i Republikës Fatmir Sejdiu foli në "Orën Përkujtimore" në Shtime dhe bëri homazhe në kompleksin memorial kushtuar të rënëve në këtë masakër. Presidenti Sejdiu në fjalën e tij tha se 15 janari, dita e Masakrës së Reçakut, është një datë në historisë tonë të stërmbushur me ngjarje të tilla tragjike, dhe ishte një "sinjal i fundit për botën demokratike e liridashëse se më nuk mund të bëhej sehir përpara krimeve të egra që po ndodhnin në Kosovë". Ai tha se masakra e Reçakut shpaloi përpara botës fytyrën e vërtetë të Millosheviqit dhe të argatëve të tij. Institucionet e Republikës së Kosovës, tha Presidenti, janë zotuar para para botës demokratike se do të ndërtojnë një shtet të lirë e demokratik të të gjithë qytetarëve dhe janë përcaktuar të ecin me vendosmëri drejt të ardhmes euroatlantike të vendit tonë. - Por, tha ai, - nuk mund të harrojmë asnjëherë atë që ka ndodhur në Kosovë, tragjeditë e shumta që ka përjetuar populli i Kosovës gjatë gjithë shekullit njëzet. Sepse, dhe kjo duhet të kujtohet gjithmonë, masakrat e ushtrive, të xhandarmërive dhe të paramilitarëve serbë ndaj popullsisë civile shqiptare janë të hershme. Ai theksoi se këto janë ngjarje që nuk mund të harrohen, por do të ruhen thellë në kujtesën tonë nacionale, "por asnjëherë me ndjenjën e revanshit a të ligësisë". Presidenti Sejdiu nënvizoi se megjithatë, "një ndjesi faji apo një kërkim faljeje nga Serbia, mbase mund ta lehtësonte udhën e bashkëpunimit në mes dy vendeve fqinje, në mes Republikës së Kosovës dhe Republikës së Serbisë". Por, fatkeqësisht, tha Sejdiu, në Serbi "ende nuk ka një forcë politike apo një lider që do të mund ta pranonte hapur atë që e di krejt bota: Serbia në Kosovë ka kryer krime kundër njerëzimit dhe ajo duhet t'i kërkojë falje popullit shqiptar dhe institucioneve të shtetit të pavarur e sovran të Kosovës". Ndërkaq Kryeministri Hashim Thaçi në fjalën e tij tha se krimi në Reçak e mbushi përfundimisht kupën e dhunës, gjenocidit dhe krimit mbi popullatën e pafajshme, të nisur një shekull më parë, duke shtuar se kjo ngjarje tragjike përshpejtoi dinamikën e proceseve diplomatike, politike dhe ushtarake. Thaçi vlerësoi se Kosova kaloi me sukses periudhën e tranzicionit, duke mbyllur plagët e luftës dhe tha se "vullneti, përkushtimi dhe vizioni për një të ardhme të mirë nuk ka munguar asnjë çast". Ai tha se qytetarët dhe liderët e Kosovës kanë dëshmuar se janë mirënjohës dhe falënderues ndaj përkrahjes që i bëri bashkësia ndërkombëtare. Qytetarët e Kosovës dhe lidershipi i saj janë të vetëdijshëm se e kaluara e hidhur nuk harrohet, tha Thaçi, duke theksuar se e kaluara nuk përsëritet vetëm kur drejt së ardhmes shkohet me vizion të qartë për të mirën e vendit. Duke folur për aktualitetin, Thaçi tha se Qeveria është duke u angazhuar çdo ditë që të rritet mirëqenia dhe kujdesi ndaj familjeve të dëshmorëve, jetimëve dhe invalidëve të luftës dhe gjithë kategorive sociale dhe se do ta kenë mbështetjen e tij të plotë. Në fund të fjalës së tij Thaçi tha se Qeveria e Kosovës me përgjegjësi të lartë punon çdo ditë që të jetë sa më parë pjesë e botës së përparuar, pjesë e integrimeve euroatlantike.