Shqipëria përfshihet nga moti i keq

Shqipëria përfshihet nga moti i keq

Rreshjet e shumta të shiut dhe dëborës në këtë fundviti kanë sjellë në Shqipëri dimrin me ashpërsinë e tij.



Në veri të vendit dëbora ka sjellë vështirësi të shumta në qarkullim veçanërisht në Shkodër, Kukës, Tropojë dhe Dibër. Në disa prej akseve kryesore rrugore policia rrugore ka këshilluar përdorimin e zinxhirëve, ndërsa u ka bërë thirrje udhëtarëve të reduktojnë udhëtimet drejt verilindjes.
Dëbora dhe ngrica ka sjellë probleme edhe në Qafën e Llogorasë, një nga boshtet kryesore të kalimit nga veriu në jug të Shqipërisë.
Ndërkohë në jug të vendit dalja e lumenjve nga shtrati ka sjellë përmbytje në Elbasan, Fier dhe Gjirokastër. Në Gjirokastër ka vështirësi edhe për furnizimin me energji elektrike.
Autoritetet po ndjekin nga afër situatën. Alfred Olli, Drejtor i Përgjithshëm i Emergjencave Civile në Shqipëri i tha BBC-së se gjithçka është nën kontroll.
Shërbimet sinoptike njoftojnë se e hëna do të jetë e kthjellët në pjesën më të madhe të territorit, por do të ketë edhe vranësira të lehta në zonat malore. Në mbrëmje pritet shtimi i vranësirave në pjesën më të madhe të territorit të cilat do të sjellin shira të dobët gjatë natës.