Nga Ajet Nuro, Montreal, Kanada

E-mail anuro@albemigrant.com

Artisti gjakovar Florent Nushi, është tashmë i njohur tek shqiptarët e Montrealit. Ishte pikërisht ky artist që ndonëse me origjinë nga Gjakova, vështirë se ka ndonjë cep të Shqipërisë që ai nuk ia di motivet dhe nuk di tia këndoj këngët. Unë, është hera e tretë që e ndjek dhe gjithmonë e gjej me interpretime të reja. Interpretimetme profesionalizëm e këngëve popullore nga të gjitha trevat bënë që pista e vallëzimit të mosngelet asnjë minutë bosh. Por, në festën e organizuar më 21 shkurt 2009, ovacionet dhe duartrokitjet që e shoqëruan Florentin pas interpretimit të të famshmes “O sole mio” nuk mund të përshkruhen. Këngët e interpretuara nga Nushi janë aq popullore saqë edhe kur mikrofonin ua kalonte të pranishmëve që vallëzonin në pistë vazhdimësia ishte e sigurtë. Serenatat korçare apo këngët karakteristike shkodrane u kënduan nga të gjithë të pranishmit. Duhet pranuar se pista e vallëzimit të restoranit “Dionysia” ishte e vogël për të përballuar oreksin e shqiptarëve për të vallëzuar vallet e tyre.

Në biletat hyrëse nuk figuronte, por prania e një artisti popullor që jeton në Montreal prej mëse 10 vjetësh dhe sidomos këngët karakteristike të trevave të Kosovës të shoqëruara me çifteli i dhanë një dinamik tjetër mbrëmjes dhe i bëri të pranishmit të kalojnë momente të paharruara. Mehdi Isufi, me zërin e tij të bukur, është kthyer në ambasador i folklorit shqiptar këtu në Kebek. Këngët frymëzuese dhe me tone patriotike she interpretimi i shkëlqyer i tij bënë që shqiptarët të ulen rreth tij si të ishin në odat e tyre diku në Kosovë apo Shqipëri. Ai u kërkoi bashkëkombasve të vetë të ruajnë gjuhën shqipe si mjeti i vetëm i identifikimit të tyre si shqiptar dhe u kujtoi të pranishmëve se kurr nuk duhet harruar e kaluara dhe ato çfarë shqiptarët e Kosovës kanë hequr nën regjimin serb.

Këtë përgjigje ma ktheu kur i urova ditën e pavarësisë i urti Agron Muhaxhiri. Ashtu është, pavarësia e Kosovës është e të gjithëve dhe le ta gëzojmë. Do të donim që pas një viti Kosova të ishte njohur nga shumica e shteteve anëtare të OKB-së por...Kosova është e pavarur dhe do të mbetet e tillë. Them se pavarësia e Kosovës është pavarësia e të gjtihë shqiptarëve sepse edhe në mbrëmjen e 21 shkurtit na u përforcua një mendim i tillë. Mjafton të përmend një fakt. Aty takova Ylberin që para 10 vjetësh ishte një fëmijë që bashkë me familjen lanë Kosovën dhe u vendosën në Sant-Jérôme rreth 60 kilometra nga Montreali. Ndërsa Rudi që ishte në një tavolinë me mua është me origjinë nga Elbasani, edhe ai ka ardhur fëmijë në Kanada. Duke u takuar aty në festën e pavarësisë së Kosovës duket se ata janë miq të vjetër. Debati mbi gjuhën shqipe, përshtatjen me shoqërinë e këtushme, shkolla, profesioni... Këtë pranverë bëhen 10 vjetë nga mbrritja e një grupi shqiptarësh në Sain-Jérome. Ndoshta një motiv për ti vizituar miqtë tanë që jetojnë aty. Ylberi na fton të shkojmë...Pse të mos shkojmë...

E thash që mbrëmja ishte madhështore ashtu siç meritonte festimi i përvjetorit të parë të pavarësisë së Kosovës. Për këtë duhen falenderuar organizatorët. Organizatorët bënë një vërejtje me të cilën edhe shumë të pranishëm ishin dakord. Ftesës për festën ndonëse iu përgjigjën shumë shqiptarë, ata u përgjigjën me vonesë, veç dy-tre ditët e fundit, duke vënë në siklet organizatorët. Por, unë do të bëja edhe një vrejtje tjetër që ndoshta duhet të kihet parasysh për herë të tjera. Organizimi i festave të tilla ndonëse kanë karakter argëtues i duhet kushtuar më shumë vëmendje anës tematike dhe le të themi protokollare. Nuk e di se si mund të justifikohet mungesa e një fjalimi të shkurtër për ngjarjen e aq pritur siç ishte shpallja e pavarësisë së Kosovës. Një material i vizionuar nuk besoj se e zvendëson fjalën e dikujt i pranishëm në festë. Shumë të rinjë, duhet ta dinë se u bënë sakrifica për të ardhur gjer tek 17 shkurti 2008. Roli i Ibrahim Rugovës në ruajtjen e kombit shqiptar nga shfarosja (mendoni sikur të kish qenë Kosova në vend të Bosnjës...) apo roli dhe sakrifica e Adem Jasharit në shtytjen e çështjes së zgjidhjes përfundimtare të Kosovës, pa harruar rolin e aleatëve tanë me në krye Shtete e Bashkuara.

Përsa mësipër, ky është këndëvështrimi i autorit që sidoqë ngjarjet i ka parë si pjesëmarrës në këtë festë. Hidhini një sy fotove të mbrëmjes dhe ato flasin vetë. Për komente shkoni tek rubrika komente e Tribuna Shqiptare: http://tribunashqiptare.com/komente/

Montreal 22 shkurt 2009

autori dhe TribunaShqiptare.com Shkrimi mund të botohet me kusht që citohet burimi