Sa greke ka ne Shqiperi?

Sa greke ka ne Shqiperi?

25.03.2009
Dokumenti i mbajtur i rezervuar për opinionin publik, e që është siguruar nga ‘Gazeta Shqiptare’, është në fakt një studim i hollësishëm që shteti shqiptar, për llogari të vetën, e ka bërë në lidhje minoritetet e njohura zyrtarisht.
Në Shqipëri, pakicat kombëtare përbëjnë 1.4 për qind të popullsisë, prej së cilës përqindje 1.17 për qind, ose 35,829 njerëz janë vetë-deklaruar si minoritarë grekë.

Këto shifra bëhen publike në një raport konfidenciale, të përgatitur së fundmi nga Zyra e Minoriteteve, në Ministrinë e Punëve të Jashtme shqiptare.

Dokumenti që është mbajtur i rezervuar për opinionin publik, është siguruar ekskluzivisht nga “Gazeta Shqiptare”. Ai është një studim i hollësishëm që shteti shqiptar, për llogari të vetat, ka bërë në lidhje me situatën në të cilën ndodhen minoritetet e njohura zyrtarisht, si paraqitet gjendja e tyre në krahasim me të kaluarën, zonat ku janë shpërndarë këto pakica si dhe llogaritja në shifra e numrit të tyre sipas llojit.

Referuar këtij materiali shumëfaqësh, në popullsinë joshqiptare, pakica kombëtare që dominon më shumë është ajo greke, e cila përbën gati 85% të totalit të pakicave kombëtare. Popullsia me kombësi greke, në pjesën më të madhe, afro 96.1 për qind e saj, është e vendosur në rrethet jugore e kufitare në Gjirokastër, Delvinë e Sarandë.

Në rrethin e Gjirokastrës, minoriteti përbën 30.1 për qind të popullsisë së përgjithshme. Në rrethin e Sarandës, duke përfshirë edhe Delvinën, ajo zë 41.6 për qind të popullsisë dhe është e vendosur pothuajse në tërë fshatrat e qytetet. Megjithatë, popullsia greke është e shpërndarë në gjithë territorin e vendit, por përqendrimet më të mëdha, jo të krahasueshme me Sarandën, Delvinën dhe Gjirokastrën, ajo i ka edhe në Tiranë, Përmet e Vlorë.

Ndërkohë që në qytetin e Korçës nuk rezulton asnjë shtetas me kombësi greke. Sipas këtij raporti, të dhënat e grumbulluara mbi shpërndarjen në përqindje të minoritetit grek i janë referuar kryesisht regjistrimit të popullsisë së vitit 1989, pasi nga konstatimet në terren ka rezultuar se kjo pakicë, me disa përjashtime, nuk ka lëvizur nga vendbanimet e saj. (BalkanWeb)