Don Lush Gjergji: Vëllazëria gjithëshqiptare po iu pengon

nga **Agim Gashi** Sat Oct 04, 2014 9:49 pm

Don Lush Gjergji: Vëllazëria gjithëshqiptare po iu pengon

“Toleranca, edhe më mirë, bashkëjetesa dhe vëllazëria gjithshqiptare, është suksesi i mbijetesës sonë, porosia dhe trashëgimia e shenjtë e të parëve tanë. Atë nuk duhet vetëm ta përkujtojmë, ruajmë, deklarojmë, por edhe ta jetësojmë, begatojmë, shtojmë, dëshmojmë dhe t’ia dhurojmë njëri-tjetrit dhe botës. Kjo çështje është si jeta, si dashuria, një proces në vazhdimësi të jetës dhe veprimeve, që duhet gjithnjë të rritet, ruhet dhe të përparojë në kohë dhe në hapësirë, që mos të kërcënohet apo rrezikohet nga rrethanat e brendshme apo të jashtme jetësore”, është mesazhi që Don Lush Gjergji, Vikar Gjeneral i Ipeshkvisë së Kosovës( Zëvendësi i Ipeshkvit të Kosovës) përcjellë në emër të Ipeshkvisë për qytetarët e Kosovës.
Don Lush Gjergji thotë në një bisedë për “Zërin” se vëllazërisht dhe bashkërisht, shqiptarët e kanë përballuar të kaluarën, historinë, sundimet e huaja, e kështu do të vazhdojnë edhe tash dhe në të ardhmen. “Tjetër rrugë dhe zgjidhje s’kemi e as që na nevojitet”, thotë ai. Don Lush Gjergji duke iu referuar të kaluarës, veçanërisht periudhës së rilindëseve, përshkruan gjendjen si të mirë, kohë kjo që ai thotë se “kombëtarja theksohet si histori dhe trashëgimi e përbashkët dhe gjithshqiptare, ndërsa fetarja, dallimet pranoheshin dhe tejkaloheshin tashmë si një faktologji. Në këtë kontekst ishte edhe thënia e Vaso Pashë Shkodranit: ‘Feja e shqiptarit është shqiptaria’, me theksim që ana fetare krishtëro-myslimane në asnjë mënyrë nuk duhet ta dëmtonte dhe rrezikonte çështjen kombëtare”.
Sot po ashtu, ai thotë se një pjesë dërmuese shqiptare vazhdon këtë traditë fatlume, e vetmja e mundshme për harmoni dhe bashkëjetesë ndërfetare shqiptare. Por, zëvendësi i Ipeshkvit thotë se dikujt vëllazëria gjithshqiptare i pengon.
“Pra, me çdo kusht duan të na ndajnë dhe përçajnë. Ne fetarisht, fatkeqësisht, jemi të ndarë, por fatbardhësisht, nuk jemi të përçarë”. Don Lush Gjergji thotë se shumëçka është e përbashkët, sikurse historia, gjuha, tradita, kultura, më se 15 shekuj edhe feja – krishtërimi. Prandaj, sipas tij kosovarët kërkojnë, kultivojnë dhe shtojnë atë çka i afron dhe bashkon, për ta zvogëluar, pakësuar dhe dobësuar atë çka i ndanë. Përpjekje që të prishen nga armiqtë gjatë historisë raportet ndër shqiptarë të besimit katolik e musliman, ai thotë se kishte dhe ka gjithnjë, si sfida të jetës dhe qenies shqiptare dhe fetare.
“Mirëpo ne kërkojmë dhe përforcojmë vëllazërinë e dyfishtë: kombëtare, si shqiptarë, dhe fetare, si monoteistë, si pararojë për ne dhe si model për Ballkan, Evropë dhe botë. Këtë e ka vlerësuar lartë edhe Papa Françesku në Tiranë me 21 shtator 2014. Ky është një fakt fatlum dhe realitet historik dhe aktual ndërshqiptarë”. Ka jo pak vendbanime të përziera muslimano-katolike në Kosovë. Toleranca fetare, sipas Don Lush Gjergjit tek popullata e thjeshtë dhe e rëndomtë nuk ka luhatje apo ndryshime negative të mëdha, edhe pse aty-këtu, ai thotë se hetohet dyshim apo drojë, siç po ndodhë në shumë vende të botës islamike. Tek shqiptarët, ai thotë se fetarja, objektet e kultit dhe të fesë, nderohen dhe çmohen nga të gjithë.

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31