Vetëm Thaçi nuk i premtoi Nuland themelimin e Gjykatës

nga **Agim Gashi** Mon Jul 13, 2015 12:10 am

Vetëm Thaçi nuk i premtoi Nuland themelimin e Gjykatës

Të gjithë udhëheqësit institucionalë që i takoi Victoria Nuland u shprehën pro themelimit të Gjykatës Speciale, përveç Hashim Thaçit i cili tha se me diplomaten amerikane vetëm ka biseduar për dhomat speciale.

Presidentja Atifete Jahjaga në takim me ndihmës-sekretaren e shtetit të SHBA’së, Victoria Nuland i tha kësaj të fundit se Gjyata Speciale do të themelohet shumë shpejt.
“Presidentja Jahjaga theksoi se institucionet e vendit dhe qytetarët e Kosovës janë të përkushtuar në ndërtimin e shtetit të së drejtës dhe në veçanti në përmbushjen e obligimeve të marra ndërkombëtare dhe se pret që institucionet së shpejti të themelojnë Gjykatën Speciale për t'i adresuar akuzat e ngritura nga raporti i Këshillit të Evropës dhe për të shmangur që një hap i tillë të merret nga Këshilli i Sigurimit i OKB’së”, u tha në njoftimin për media nga Presidenca, pas takimit Jahjaga –Nuland.
Një zotim për themelimin e Gjykatës Speciale, Nuland e ka marrë edhe nga Kryeministri Isa Mustafa.
“Kryeministri Mustafa dhe Ndihmës Sekretarja Nuland biseduan edhe për krijimin e Dhomave të Specializuara dhe rëndësinë e madhe që ka për Kosovën themelimi i tyre, pasi që kjo dëshmon se Kosova ka kapacitet për të marrë vendime të rëndësishme për të ardhmen e saj, për të përmbushur obligimet ndërkombëtare si dhe për të ecur përpara në integrimet euroatlantike. Në këtë kontekst, Kryeministri Mustafa theksoi se Republika e Kosova do t’i marrë të gjitha obligimet që ka dhe do të ecë sigurt në rrugën e saj drejt të ardhmes euroatlantike”, thuhet në njoftimin e zyrës së Kryeministrit.
Edhe Kryetari i Kuvendit të Kosovës Kadri Veseli në takim në Nuland, tha se Kosova ‘do ta kapërcej të sfidë me përgjegjësi shtetërore në partneritet me SHBA-në dhe Bashkimin Evropian”.
“Në takim u theksua nevoja e ecjes përpara të shtetit të Kosovës, në integrimet evroatlantike dhe për këtë, znj.Nuland ofroi mbështetjen e plotë të SHBA-së. Po ashtu znj. Nuland shprehu nevojën që shteti i Kosovës dhe lidershipi i saj politik të tregojnë mençuri dhe vendosmëri në ballafaqimin me sfidat integruese dhe zhvilluese të Kosovës, siç janë procesi i dialogut me Serbinë dhe gjykata speciale. Duke u ndalur në këtë të fundit, Znj. Nuland theksoi se është e nevojshme që Kosova me vendosmëri ta mbyllë këtë kapitull në mënyrë që vendi të ecë përpara, ndërsa kryetari Veseli theksoi se Republika e Kosovës do të kapërcej këtë sfidë me përgjegjësi shtetërore në partneritet me SHBA-në dhe Bashkimin Evropian”, u tha në njoftimin pas takimit.
Ishte vetëm zëvendëskryeministri Hashim Thaçi ai që nuk i premtoi Zëvendëssekretares Victoria Nuland themelimin e Gjykatës Speciale.
“U takova me Zëvendës Sekretaren e Shtetit Victoria Nuland për të diskutuar zhvillimet e fundit në Kosovë dhe rajon përfshi procesin e dialogut në Bruksel, Forcat e Armatosura, krijimin e dhomave të veçanta si dhe zhvillimin ekonomik. Kosova dhe SHBA-të kanë partneritet strategjik bazuar në vlera të përbashkëta. HTH (Foto: A.Ibrahimi)”, ka shkruar Thaçi në Facebook, për takimin.

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31