Vdes shkrimtari i njohur Dhimitër Xhuvani

Kryeministri Berisha ngushëllon familjen e shkrimtarit Dhimitër Xhuvani




Berisha ngushëllon familjen e shkrimtarit Dhimitër Xhuvani

Kryeministri Berisha i shprehu sot në mbrëmje ngushëllime familjes së shkrimtarit të njohur Dhimitër Xhuvani, i cili u nda sot nga jeta. Kryeministri Berisha e cilësoi Dhimitër Xhuvanin një ndër krijuesit më të fuqishëm të letërsisë shqipe, i admiruar po ashtu për mirësinë, intelektualizmin dhe qytetarinë e tij.

“Letrat shqiptare, - tha Kryeministri Berisha - humbin një prej princërve të tyre më të shquar, një nga krijuesit më të fuqishëm të letërsisë shqipe. Bota intelektuale humbet intelektualin e madh. Dhimitër Xhuvani është një personalitet i rrallë në botën e letrave dhe të mendimit shqiptar, i cili sintetizoi, ndofta më mirë se kushdo tjetër, krijuesin e shquar e të talentuar me qytetarin me integritet të lartë moral dhe njerëzor. Kushdo që e ka njohur e ka admiruar për romanet e tij, por ata që e kanë njohur nga afër e kanë admiruar po kaq për njerëzinë, mirësinë, intelektualizmin dhe qytetarinë që ai rrezatonte. Ai lë një emër të madh, lë një boshllëk të madh.”

Presidenti Topi nderon artistin e madh Dhimitër Xhuvani

Nderohet figura e Dhimitër Xhuvanit



Presidenti Topi u shpreh ngushëllimet familjarëve të artistit të madh, Dhimitër Xhuvani


Presidenti i Republikës, Prof. Dr. Bamir Topi vizitoi sot familjen e Dhimitër Xhuvanit, shkrimtarit, skenaristit, regjizorit, artistit të madh, i cili u nda nga jeta një ditë më parë.
Pasi u shprehu të afërmve ngushëllimet më të sinqerta për humbjen e njeriut të shtrenjtë, Presidenti i Republikës vlerësoi lart krijimtarinë dhe veprën e Dhimitër Xhuvanit si një thesar i vyer i traditës dhe kulturës sonë kombëtare. “Me punën dhe përkushtimin e tij, ai u kthye në një model të pastër të krijuesit dhe artistit me ndjenja, vlera e virtyte të çmuara njerëzore dhe të një profesionisti virtyoz me një personalitet të spikatur e karakter mbresëlënës”, - vuri në dukje Kryetari i Shtetit. Duke shprehur mirënjohjen për kontributin e z. Xhuvani në edukimin dhe formimin e brezave më të rinj të artistëve, regjizorëve e skenaristëve në kinematografinë shqiptare, Presidenti Topi nënvizoi se kujtimi i tij do të mbetet përgjithnjë i pashlyeshëm në memorien e artdashësit shqiptar përmes librave dhe filmave, personazheve të spikatur, skenave të gjalla e plot dinamizëm të skalitura thellë ndër vite në mendjen e adhuruesve të kinemasë.