Shqiptarët për DioGuard-in

Shqiptarët për DioGuard-in

BEQIR SINA


Shpallja e kandidaturës së Joe Dioguard-it për Senatin Amerikan i jep shqiptaro-amerikanëve në Shtetet e Bashkuara të Amerikës një mundësi të shkëlqyeshme që të sjellin në Uashington një zë të fuqishëm dhe përfaqësues të tyre. Joe DioGuard-i po garon si republikan kundër demokrates Kirsten Gilibrand për shtetin e Nju-Jorkut, mirëpo bindjet personale për politikën e brendshme amerikane nuk duhet që të të ndalojnë ty që të mos e mbështesësh fuqimisht DioGuard-in, sepse ai është i mirë për Amerikën e më i mirë për shqiptaro-amerikanët!
Arsyet se pse ti, si shqiptaro-amerikan, duhet të qëndrosh prapa Joe DioGuard-it janë të shumta dhe të komplikuara, mirëpo një rishikim i shkurtër i veprimtarisë së tij historike për kauzën shqiptare do të të informojë më afër për të. Zgjidhjet e tij të propozuara dhe të mundshme për të rigjallëruar krijimin e vendeve të reja të punës, për të frenuar shpenzimin e pakontrolluar të Qeverisë dhe për të bërë Qeverinë që të punojë për ty vetëm se plotësojnë arsyet se pse ti duhet te marrësh pjesë aktivisht në fushatën e tij për senator.

Si shqiptaro-amerikanë që jetojmë në këtë vend të mrekullueshëm, ne tani po përballemi me një numër shqetësues të humbjeve të vendeve të punës, me borxhin kombëtar që është në rritje e sipër dhe me një shpenzim federal të paparë ndonjëherë.
Këta faktorë së bashku paraqesin një të ardhme të pasigurt për Shtetet e Bashkuara. Nëse ne nuk veprojmë tani që të sjellim në Kongresin Amerikan një përgjegjësi fiskale dhe transparencë, atëherë do të lejojmë që sjellja e papërgjegjshme politike të mbajë peng të ardhmen tonë dhe të ardhmen e fëmijëve tanë. Zgjedhja senator e Joe Dioguard-it është rruga drejt qëndrueshmërisë dhe rritjes afatgjatë ekonomike, krijimi i vendeve të reja të punës mu këtu në Amerikë, një qeveri të hapur dhe që lejon qasje, si dhe praktika të shëndosha buxhetore.

Rëndësia e një Amerike të fuqishme ekonomikisht dhe politikisht ka kuptim për të gjithë shqiptaret anekënd në vendet e tyre etnike. Shtetet e Bashkuara dhe shqiptarët kane një lidhje të veçantë duke filluar nga mbështetja e Woodrow Wilson-it për Pavarësinë e Shqipërisë në vitin 1912.
Ishte vendosmëria dhe udhëheqja e Shteteve të Bashkuara që e bënë të mundshme pavarësinë e Kosovës në vitin 2008. Një Amerikë e fuqishme do të jetë e pajisur më mirë që të përdorë politikën e saj të jashtme për të arritur objektivat dhe qëllimet e saj. Është pikërisht puna që Joe DioGuard-i ka bërë me sukses për më se 20 vjet nëpërmjet Kongresit Amerikan që thellësisht e ka formuar politiken e jashtme amerikane ndaj të gjithë shqiptarëve në përgjithësi, e në veçanti ndaj Kosovës.

Gjate shërbimit të tij në Dhomën e Përfaqësuesve (1985-1989), Joe DioGuard-i paraqiti disa rezoluta të para në mbështetje të kërkesave legjitime të kosovarëve për liri dhe për trajtim të barabartë. Në atë kohë shumica e anëtarëve të Kongresit dhe publiku amerikan nuk kishin dëgjuar për Kosovën, e aq më pak për trajtimin e tyre mizor nën Jugosllavinë e atëhershme. Pas largimit nga Kongresi Amerikan DioGuard-i themeloi Ligën Qytetare Shqiptaro-Amerikane që t’i përfaqësojë në Uashington shqetësimet e popullit shqiptar.

Veprimtaria e LQSHA-së nën udhëheqjen dhe vizionin e Joe DioGuard-it dhe gruas se tij, Shilrey Cloye-s pati sukses në sensibilizimin e Kongresit Amerikan dhe të komunitetit ndërkombëtar ndaj gjendjen e vështirë politike të shqiptarëve që jetonin në Kosovë, Mal të Zi, Luginën e Preshevës, Çamëri dhe në Maqedoni.

Joe dhe Shirley iniciuan dëshmi dhe dëgjime në Kongresin Amerikan për të shpalosur kushtet politike dhe ekonomike që vazhdimisht përkeqësoheshin në Kosovë në vitet e fundit të 1980-ve. Gjithashtu, me ftese të Joe DioGuard-it, disa anëtarë të Kongresit Amerikan shkuan në tokat shqiptare për të dokumentuar dhe informuar Kongresin Amerikan dhe publikun botëror për brutalitetin e tmerrshëm të ushtruar nga Slobodan Milosheviçi kundër kosovarëve gjatë viteve të ‘90-ta dhe më vonë gjatë gjenocidit kundër shqiptareve në vitet 1998-1999.

Prandaj, si shqiptaro-amerikanë, ne e kemi një obligim kombëtar dhe moral që të mbështesim Joe DioGuard-in në garën e tij për Senatin Amerikan, sepse gjatë tri dekadave të fundit ai ka shërbyer si mbrojtës i lirisë dhe sigurisë së popullit shqiptar. Në Senatin Amerikan DioGuard-i do të vazhdojë me pasion t’i shtojë rezultate trashëgimisë së tij të promovimit dhe të mbrojtjes së interesave të shqiptarëve për liri, demokraci, zhvillim ekonomik dhe paqe.