Halil Xani: (Blic) Mahi II‏

Ditari javor ( i imagjinuar) i një drejtori

E hënë

Dola në qytet. Sot është ditë tregu. Paradite u takova me disa mësimdhënës të pasditës, kurse pasdite me ata të paraditës. Më dhanë drekë, faleminderit prej tyre. Besa edhe çaj kemi pirë shumë me ta.

Në mbrëmje mora vesh se gjysma e mësimdhënësve nuk i kishin mbajtur orët.

E martë

Sot shkova në Drejtorinë Komunale të Arsimit. Në kohë të mëngjesit me disa shokë të kësaj Drejtorie shkuam në restorant. Pagova unë se vërtet i kam shokë të mirë. Më përkrahin dhe më mbështesin gjithmonë.

Në mbrëmje më thanë se në shkollë nxënësit paskan luajtur futboll, kurse mësimdhënësit shah dhe lojë me gurë në sallën e tyre.

Kësaj i thonë kur s`është maca, jo, por kur nuk është maçorri minjtë hedhin valle.

Ua tregoj unë qejfin atyre sa të shkoj në punë.

E mërkurë

Sa deshta të nisem për në punë, një fqi më thirri të shkojmë tek një mik i tij për kryeshëndoshë. Kur hymë në odë thashë me vete, ende nuk jemi mbushur mend.

Në krye të vendit qëndronte hoxha, afër tij nja dy haxhinj, disa pleq të tjerë e pastaj ne.

Ma dhanë fjalën të flas, por u nxora  mirë. Thashë le të flasin ata që janë në krye të vendit. Thënë të drejtën unë as nuk di të flas në oda burrash e në anën tjetër edhe më vjen marre kur është kallaballëk.

Nga burime të besueshme mora vesh se sot  në shkollë puna paska shkuar hallakamë, pa mua.

E enjte

Kisha planifikuar sot të shkoj më herët në punë e të marr masa ndaj atyre punëtorëve të padisiplinuar, por gruaja ma përkujtoi se sot ishim të thirrur në një dasmë te një ilaka e saj. Shkuam dhe u kënaqëm. Gjatë ditës dasmë allaturka, me muzikë tallava e me krisma kallashi, kurse në mbrëmje, allafranga,  në restorant, me  mish, me muzikë të gjallë deri në kupë të qiellit e me valle deri në orët e vona të natës.

Sonte u ktheva tepër vonë nga dasma, në shtëpi. Haber nuk kam se si kanë vajur punët në shkollën time.

E premte

U bëra gati për punë. E bëra gati edhe makinën. Kur doli gruaja të më përcjellë, plani ndërroi tërësisht. -Jemi vonuar, - më tha,- ende nuk i kemi blerë lakrat për turshi.

Heu, thashë s`qenka shkruar as sot të shkoj në punë. Urdhëri i komandantit duhet zbatuar.

Shkova në qytetin fqinj, por tregu si tregu, m`i mori mendët e nuk më lëshoi deri në mbrëmje.

Nga burimet e mia mora vesh se në shkollë asgjë nuk po shkon si duhet, por ua tregoj unë qejfin atyre kur të shkoj të hënën.

O Zot, shyqyr që nuk punohet edhe në fundjavë. Nesër e pasnesër do të pushoj se vërtet pata një javë të mundimshme. As ditarin nuk do ta mbaj.

Ditari Javor

E hënë, 3 nëntor 2008

Në mëngjes kam shkuar në Skenderaj. Pak para orës tetë isha te ordinanca e stomatologut. Në derë shkruante se punon nga ora tetë, por nuk erdhi deri pas orës 9,00. Dr. Njaziu (Gruda) më kërkoi falje që u vonua pak. Unë ia ktheva: Jo, jo, ju  nuk jeni vonuar, por unë që vërtet kam ardhur në ora tetë, ama jam vonuar një vit me këtë dhëmbin e prishur. Ma ndreqi dhëmbin saora. Nuk ndjeva dhembje.

Titullit të një gazete “410 pacientë do të shërohen me radhë” ,  ia shtova: nëse kanë ymer deri t`u vije radha.

Në gazetën “Shekulli” , në internet, ishte edhe një shkrim për një luftë me sëpata në mes të axhës me djalë dhe nipit të tij, për një rrip kullose afër shtëpive ( diku në Shqipëri). Sa keq. Kjo ndodh ( në shek XXI) kur shteti nuk i zgjedh me kohë kontestet për pronat.

E martë, 4 nëntor 2008

Në ditën e sotme, më 1967, ka ndërruar jetë  babai im, ndjesë pastë, të cilin shumë e kam dashtë, por edhe më ka dashtë. Jo vetëm unë e kam dashur atë. Se vërtet ka qenë njeri i mirë dëshmon fakti se gjysma e fëmijëve të mëhallës i kanë thënë “babë” sikur edhe unë. Ai pa fije përtese u bënte fëmijëve ski, saja e lodra të tjera, ama tek ai: fëmijët e jepnin betimin se nuk do ta harronin mësimin”. Baba Ferat e donte shumë shkollën. Vet nuk kishte arritur të shkollohej, por këtë e donte për neve. Suksesi im në shkollë e gëzonte pa masë. Nuk kalonte ditë ( kur ishte në shtëpi) e të mos më pyeste a kam marrë ndonjë notë të mirë. Në ditën e sotme, para 41 vitesh, më kujtohet , ishte një mot i bukur sikur sot. I gjithë xhemati ( ishin shumë) hëngrën drekë, morën abdes dhe qëndruan në kopshtin tonë me pemë. Edhe një pjesë e madhe e të pames  qe kryer në ambient të hapur. Deri para luftës të tre djemtë ( ne vëllezërit) e kemi pasur nga një foto të babës, të cilën e patëm rritur e futur në kornizë, por  lufta na i mori edhe ato fotografi. Kështu, tash pamjen e babës e ruaj vetëm në kujtesën time.

Librin e dytë me poezi për fëmijë e kam titulluar:“Unë e babi mjeshtër”, në shenjë kujtimi për të. Jam krenar që e kisha një baba të tillë,   dhe gëzohem shumë kur dëgjoj të flasin mirë për të, njerëz që e kanë njohur.

Ai për aq sa kishte mundësi nuk kthente kë prapa pa  e ndihmuar kur kërkonte para a ndonjë gjë prej tij.

Nga lajmet (ngjarjet e ditës) veçova: Në RTK pashë pamje nga rrënimi i një objekti bukur të madh në një fshat të Prishtinës, ku nuk është zonë e urbanizuar. Zyrtari i Prishtinës tha se do të urbanizohet ( ndoshta) më vonë edhe kjo pjesë. TV jepte pamje të ndërtesave shumëkatëshe në Prishtinë të ndërtuara  me leje të Bajram Begut, por të cilat nuk guxojnë t`i rrënojnë. Kësaj i thonë “Kur s`ke çka i bën kalit,i sjell samarit”.

Lajmi më i ri: U arrit pajtimi që qytetarit Ali Kadriu, në anën tjetër të lumit Ibër t`i lejohet vetëm ta pastrojë shtëpinë e vet, se ta riparojë po u hidhëruakan serbët. Deri kur edhe ndërkombëtarët me dy kute? Bëjnë çmos që serbët të mos i trazojë askush, kudo që jetojnë në Kosovë, ndërsa shqiptari matanë urës nuk guxon ta riparojë shtëpinë, por vetëm mund ta pastrojë. Hajde drejtësi hajde!

Sapo mendova se e përfundova këtë fletë ditari, më duhet të shtoj edhe këtë se po të komentohen lajmet nga Kosova, duhet të shkruhen edhe shumë faqe të tjera. Ja edhe disa tituj: U arrestuan disa mjekë për transplantime ilegale të organeve në Prishtinë.

Kërkohet kryetari i Komunës së Kaçanikut i dyshuar për rrëmbim dhe detyrim. Gjatë bastisjes, në shtëpinë e tij policia kishte gjetur shumë armë dhe municion.

Ai është arratisur, (thuhet)  jashtë vendit.

Mbahen zgjedhjet në SHBA. Ka gjasa të mëdha  Obama të zgjidhet kryetar.

E mërkurë, 5 nëntor 2008

Gjumi më doli më herët se zakonisht. Me kufje dëgjova radion në aparatin telefonik. Radio Kosova kishte pasur program special lidhur me zgjedhjet në SHBA. Përcillej atmosfera e fitores se Obamas,  kryetar  i SHBA-ve. Atmosfera paszgjedhore duhet t`ju shërbejë shembull gjithë botës demokratike, e sidomos neve shqiptarëve. Mc Kein tha se Obaman deri dje e kisha kundërshtar, sot ai është edhe kryetari im.

Edhe gjatë ditës së sotme kanë vazhduar punimet në rrugën e re, mu para shtëpive tona. Çudi me njerëzit tanë. Gjatë tërë ditës afroheshin afër makinave dhe më tepër pengonin sesa ofronin ndonjë ndihmë. Kisha frikë se mos ndonjërin po e shtypë ndonjë makinë. Sa shumë jemi të prirur për biseda, polemika nevojë e pa nevojë. Një palë kërkojnë të zhvendoset një urë, pala tjetër ngul këmbë vetëm aty ku është, se aty e kanë “rahatu” kanalizimin e shtëpive të veta.

Edhe më tej mbretëron mot i thatë. Fermerët drojnë se fara e hedhur e grurit në ara mund të prishet. Shumë bashkëfshatarë po ankohen se uji në bunaret e tyre është pakësuar në minimum. Një fqi ankohej se gratë nuk po ia kursejnë ujin. Ka të drejtë.

Eh, si kanë ndërruar kohërat. Një djalë vjen ( në dyqanin tim) e më thotë: Mos i jep cigare veresi babës. E unë e njoh babën e tij. Ai punon më tepër se i biri. Prej nga kjo frikë nga i biri? Pak më vonë erdhi ai baba e më tha, më jep veresi, por mos i trego djalit, këtë borxh ta paguaj vet.

Nga Halil Xani

... Liderët aktualë serbë duhet të dëgjojnë
mesazhin se nëse vazhdon të mbështesë mesazhin...Express, 17.08.2006, f.4;

...ndihmë mjekësore në komunën e Pejës kanë kërkuar ndihmë...Po aty, f. 10;

...për herë të tretë, pasi që ka qenë edhe dy herë të tjera...Po aty, f.21;

...ka tentuar të kryej vetëvrasje në tentativë…Epoka e Re, 02.08.2006, f.8;

...lopët kullotnin lirshëm dhe mund të ishin rrezik për
fëmijtë me brirët e tyre të mprehtë...Po aty, f.10;

I pyetur nëse nga mediat serbe nëse serbët...Express, 05.08.2006, f.6;

...djersitja, urinim,kollitje, vjedhje etj., Infopress, 10.08.2006 f.19;

…që lidershipi Kosovar të bëhet unik dhe koheziv në qëndrimin e saj…
Express, 04.08. 2006, f.4;

…për ta ndal Malin e Zi të pavarësohet, që në fakt ajo tani është e pavarur…
Express, 17.07.2006, f.4;

…në pjesën e prapme të shpinës… po aty;

…përkundër roli të saj të ndërmjet dhe transitor, TMK… Exspress, 19.07.2006, f.4;

Pas kompletimit të zyrës…do të bëhet pasuria e çdo bartësi…Po aty, f.8;

Raporti i Organizatës për demokraci, antikorrupsion dhe dinjitet “Çohu” në raportin e saj… Epoka e Re, 19.07. 2006, f.3;

… nëse bie në sy ndonjë lojtar që ka nevojë klubi…po aty;

…rrufeja ka goditur fëmijët, këta të fundit… Express, 12.07.2006, f.12;

…I lënduari është dërguar në QKU në Prishtinë, thuhet në njoftimin e qeverisë…po aty ;

…u keqtrajtuan më se 2000 mijë ushtarë… Epoka e Re, 07.2006, f.6;

Gjermania nëse kalon sidën e quajtur Itali…Po aty, f.23;

Shitet shtëpia dykatërshe...Po aty, f.29;

Ne kemi resurse edhe nëntokësore edhe mbitokësore të mëdha… Express, 14.05.2006, f.9 ;

…çdo vendim pa pëlqimin e Kuvendit do të ishte e pavlefshme, Kosova Sot, 05.05.2006, f.3;

…monotonia e territ do të na përcjellë gjatë, sepse KEK-u ka arritë tashmë të bëjë jetën e njerëzve të pakuptimtë. Exspress, 17.02.2006 f.11;

…rreth 200 metra në jugperëndim të Berlinit, Koha Ditore , 24.07.2006, f.18;

Gjithsej në botë sot jetojnë 6.6 milionë banorë... Express 10.08.2006, f.18;

...protesta e banorëve të KEK-ut ka qenë e paralajmëruar…Express, 16.02.2006;

Shoferi dhunues i autobusit, Iliria Post, 06.03.2006, f.13;

…nga skuadra keq zi shkau i mjeteve financiare është rikthyer sërish…Express, 14.05.2006;

...gjë që edhe kjo u mirprit shumë mirë… Kosova Sot, 25.02.2006, f.17;

Nëse gjërat shkojnë siç i ka parashikuar menaxhmenti i KEK-ut ky dimër që vjen do të jetë më i mirë se dimri i kaluar. Po aty;

Rada Trajkoviç nuk ka dashur të deklarohet se nga KSN nuk ka dashur të tregojë,
Express, 10.05.2006, f.5.

Shpenzimet vjetore të stafit të UNMIK-ut për një vit në Kosovë… Epoka e Re, 14 qershor 2006, në ballinë;

NN vozit makinën e dehur-Kosova sot, 27.7.2008

Bashkimi Evropian të fillojë misionin e saj…Radio Kosova, 11.7.2007, Pr. i mëngjesit

Këshilli i Sigurimit dhe anëtarët e saj…TV 21, 12.06.2007 (Pr. i mëngjesit)