Cikël poetik nga Viktoria Xhako

nga **Agim Gashi** Wed Nov 21, 2012 10:30 pm

Cikël poetik nga Viktoria Xhako

MOS E FYEJ LOTIN
Nga vëllimi i tretë poetik gati për botim “E ASKUJT”

Fshija lotin asaj, o njeri,
I pastër është, jo hipokrizi.
Puthja buzën që i dridhet, o njeri,
Trishtim është, jo pabesi.
Qetoja 1) zemrën që i përpëlitet, o njeri,
Vuajtje është, jo djallëzi.

1)Qetësoja

E hënë 9 janar 2012 ora 16:00

ZEMRA

Mos thoni që duhej ta vrisja zemrën,
Kur tingujt e parë nisi t’i rrihte me vërtik.
Se udha ku këmbët dridhshëm do të shkelnin,
Do të ishte e mbushur me të ndezur thëngjij.

Mos thoni që duhej ta vrisja zemrën,
Kur tingujt iu varën të zinj në fyt.
Se të tatëpjetën sot nuk e zbres vetëm,
Unë dhe zemra rrokullisemi vetë i dytë.

E hënë 19 nëntor 2012 ora 14:00

ZEMRËN I PUTH

Sa herë era lajm më sjell prej teje,
Zemrën ia puth me etje e mall.
E drithëruar vrapoj nëpër kujtime,
Dhe zemra, nga lodhja, le të më ndalë.

E diel 18 nëntor 2012 ora 13:30

STUHITË NUK RESHTIN

Kur të reshtin stuhitë, the, që më pret.
Në urnë unë po ruhem hi.

Horizontet mjegulla dendur, më fanepsen 1)
Kukuvajka të përdala, zhgarravina me sy të xhamtë,
Që ndërrojnë ngjyra e veshje të pështira,
Dhe nga ti më ndajnë, nga ti.

Po stuhitë nuk po reshtin...
Rruga e paqes qan me lot të kuq...
Pemët rrudhin krahët shtrënguar në gji.
Lulet përreth kryet ulin me dhimbje e turp.

Stuhitë, kur të reshtin, unë do t’i ruaj përsëri...

Dimër, verë, borë a shi,
Unë do të pres...
-Se nuk shkoj dot pa ty, - më the,
-Rrugë kemi vetëm një. -

Unë pres e prek stuhi.

1)Shfaqen

E premte 31 gusht 2012 ora 10:00

VIKTORIA XHAKO
(ZHORZH SAND)

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31