Intervistë| Don Lush Gjergji: Pagëzimet s’i bëmë për t’i provokuar të tjerët

nga **Agim Gashi** Mon Apr 06, 2015 1:15 am

Intervistë| Don Lush Gjergji: Pagëzimet s’i bëmë për t’i provokuar të tjerët

Shtatë persona u pagëzuan mbrëmë në Katedralen “Nëna Terezë” në Prishtinë. Këtë veprim nuk e kemi bërë për t’i provokuar të tjerët. Ngjarje të tilla ndodhin në gjithë botën prej 2 mijë vjetësh. Pagëzimet nuk i kemi bërë për spektakle, kamera apo televizione. Zëvendësi i Ipeshkvit të Kosovës, Don Lush Gjergji, flet për Express.

Express: Sa persona u konvertuan në të krishterë mbrëmë në Natën e Pashkëve?

Don Lush Gjergji: Diku ishin shtatë. Por, me këtë merret Don Jeton Thaçi, i cili është person që merret me përgatitjen e kësaj ceremonie...Të rritur për çfarëdo arsye me prejardhje të krishterë apo jo të krishterë, të cilët duan të pagëzohen, pagëzohen të shtunën e madhe të Natës së Pashkëve. Këtë traditë e ka Papa në Romë dhe në të gjitha katedralet. Kuptohet ku ka të rritur. Ku
nuk ka të rritur atëherë merren fëmijët nga familjet e krishtera dhe i pagëzojnë gjatë asaj nate.

Express: Nëse ju kujtohet ato 16 pikat e Papa Franceskut, ku thotë se është kundër spektakleve religjioze. A po krijohen spektakël prej Kishës Katolike të Kosovës duke i konvertuar njerëzit në prani të mediave?

Don Lush Gjergji: Kjo është një çështje për diskutim. Ne nuk e bëjmë para kamerave dhe nuk e bëjmë për kamera e televizion e as për të dëshmuar apo provokuar kënd. Por, Nata është më e madhe dhe më e shenjtë e gjithë të krishterëve.

Express: Nëse ju kujtohet Papa thotë se në vend të spektakleve religjioze duhet të japim shembuj të mirë. A po jepni shembull të mirë me këto konvertime?

Don Lush Gjergji: Jo, vetëm Papa por të gjithë duhet të japim shembuj të mirë. Por, duhet ta definojmë çka do të thotë spektakël, sepse edhe meshat e Papës dhe udhëtimet e tij transmetohen. Janë çështje nga këndvështrime të ndryshme. Por, një gjë është e sigurt se ne këtë nuk e bëjmë as për spektakël, as për televizion, por e bëjmë si një mundësi dhe një detyrë për ata që janë të përgatitur dhe duan ta pranojnë krishterimin dhe ta përqafojnë pagëzimin.

Express: Pra, kjo nuk është në kundërshtim me thënien e Papës se nuk duhet bërë spektakle religjioze?

Don Lush Gjergji: Besoj se jo. Kjo varet edhe me çfarë shpirti bëhet. Ne thjeshtë e bëjmë një veprim i cili është i paraparë me traditën dhe ritet 2 mijë vjeçare të krishterimit dhe me kërkesën dhe përgatitjen e njerëzve.

Express: Rrjedhimisht, edhe viteve tjera do të ndiqet një traditë e tillë?

Don Lush Gjergji: Më herët s’kemi pasur katedrale në Prishtinë, kemi pasur katedrale vetëm në Prizren, por prej se ekziston krishterimi ekzistojnë edhe pagëzimet e të shtunë së madhe për të rriturit. Ata mund të jenë të familjeve të krishtera, prejardhja e tyre mund të jetë e ndryshme, mund të jenë agnostikë, mund të jetë dikush indiferentë, mund të jetë dikush që e ka rizbuluar fenë dhe Zotin.

Express: Zakonisht këto konvertime ndodhin nga njerëzit e fesë myslimane të cilët kalojnë në fenë e krishterë. A e rrezikon kjo formë e konvertimeve këtë paqen mes religjioneve në Kosovë?

Don Lush Gjergji: Ju, të dashtun, kontaktoni me ata që pagëzohen. Për sa kam pas unë kontakt me ta, askush prej tyre nuk e pranon shprehjen konvertim. Ata ose kanë qenë agnostikë, ose kanë qenë indiferentë, ose kanë qenë. Duhet të kontaktohen ata për të dëgjuar arsyet e tyre për një hap të tillë.

Express: Rrjedhimisht, edhe nëse i shohim spektakle të tilla edhe të bashkësive tjera fetare, duke i kthyer në fenë e tyre njerëzit përmes spektakleve nuk duhet të çuditemi dhe nuk e prish harmoninë fetare kjo formë?

Don Lush Gjergji: Ne bisedojmë haptas, në mënyrën më vëllazërore edhe me Bashkësinë Islame dhe ne këto çështje i bisedojmë qetë dhe vëllazërisht. Liria fundi i fundit është dhurata e Zotit e përcaktuar edhe në ligje e Kushtetutë. Nëse Zoti na ka krijuar të lirë kush jemi ne që t’ia mohojmë lirinë njëri-tjetrit. Aq më pak vëllau vëllaut si shqiptarë t’ia mohojmë këtë të drejtë që na e ka dhuruar Zoti
.

Mon	Tue	Wed	Thu	Fri	Sat	Sun
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30