Për 94 vende pune 538 kandidatë me kualifikime superiore!

Për 94 vende pune 538 kandidatë me kualifikime superiore!



Se papunësia, edhe në zonën jugore të Republikës i ka goditë ashpër edhe personat me kualifikime të ndryshme superiore, dëshmon edhe një konkurs i shpallur para do kohe nga ana e Drejtorisë komunale të arsimit në Prizren, për 94 vende pune në shkollat e këtushme, për vitin shkollor 2009- 2010. Tanimë kur procedura e konkurrimit ka përfunduar, autoritetet komunale të arsimit, kanë njoftuar se për këto vende pune, ku kriter kryesor për pranim është posedimi i diplomës së fakultetit, janë evidencuar 538 kandidatë, selektimi i të cilëve do të përfundojë këtyre ditëve. Sipas Drejtorisë komunale për Arsim në Prizren, shpallja e këtij konkursi, synon plotësimin e të gjitha vendeve vakante të punës, por edhe plotësimin me kuadro të kualifikuara, edhe në rrjetin e shkollimit fillor. Përndryshe në rajonin jugor të Kosovës, në mesin e afro 60 mijë personave të cilët janë në kërkim të ndonjë vendi të punës, ndodhen edhe afro 600 punëkërkues me kualifikime superiore.

M. Shasivari