Sejdiu e Thaçi të bindur në fitore në GJND

Sejdiu e Thaçi të bindur në fitore në GJND





Presidenti Sejdiu dhe kryeministri Thaçi të bindur se Kosova do të triumfojë edhe në GJND

Prishtinë- Presidenti Fatmir Sejdiu dhe kryeministri Hashim Thaçi besojnë në Gjykatën Ndërkombëtare të Drejtësisë, duke vlerësuar se ajo do të japë verdiktin final në favor të pavarësisë së Kosovës. Prishtina beson në drejtësinë ndërkombëtare thonë krerët shtetërorë. Presidenti Fatmir Sejdiu tha se beson në Gjykatën Ndërkombëtare të Drejtësisë dhe vendimit që ajo do të marrë në favor të pavarësisë së Kosovës.
“Ne besojmë në verdiktin që do të sjellë gjykata dhe në punën e gjykatësit besojmë, sepse është një prej gjyqtarëve me nam dhe famë në profesionin që kanë”, tha Sejdiu .
Edhe kryeministri Hashim Thaçi tha se nuk ka asnjë dilemë që Gjykata do të vendosë në favor të pavarësisë së Kosovës
“Nuk duhet të pretendojmë të politizojmë procesin e gjykatës. Duhet të besojmë plotësisht në drejtësi dhe dëshiroj të falënderoj të gjitha vendet që e kanë përkrahur procesin e pavarësisë së Kosovës. Tash edhe njohja nga Arabia Saudite është një mesazh i qartë se procesi i njohjeve të shtetit të Kosovës do të ketë vetëm vazhdimësi pozitive dhe ne i besojmë drejtësisë”, tha Thaçi. Procesi gjyqësor për Kosovën në Hagë ka filluar me 17 prill dhe faza e parë pritet të mbyllet me 17 korrik, kur do të kthehen në gjykatë përgjigjet nga vendet që do të shqyrtojnë deklaratat e njëri-tjetrit. Ndërsa një mendim përfundimtar Gjykata Ndërkombëtare e Drejtësisë mund ta marrë më së largu në pjesën e parë të vitit të ardhshëm .