Haradinaj vizitoi familjen Rugova

Haradinaj vizitoi familjen Rugova





Nga Express

Kryetari i Aleancës për Ardhmërinë e Kosovës (AAK), Ramush Haradinaj, vizitoi sot varrin e presidentit të ndjerë Ibrahim Rugova dhe familjen e tij.

Haradinaj e ka vlerësuar lart figurën e Rugovës dhe tha se AAK-ja u kushton kujdes të posaçëm traditës dhe vlerave të popullit të Kosovës.

Në shenjë respekti për vlerat dhe traditën Haradinaj përkujtoi se ditët e fundit ka vizituar edhe Prekazin, për të cilin vlerësoi se edhe aty ka traditë të vlerave të vendit tonë.

Lideri i AAK-së ritheksoi sot orientimin e këtij subjekti si parti e djathtë në spektrin politik të Kosovës. Sipas tij, historiku i AAK-së si parti e djathtë daton që në themelimin e saj dhe në debatet e brendshme partiake është arritur në konkluzionin për pozicionimin e djathtë.

Haradinaj përsëriti ofertën për bashkëpunim me partitë e tjera, të cilat e llogarisin veten parti të djathta.

I pyetur nëse bashkëpunimi me partitë e këtij spektri do të përfshinte edhe Partinë Demokratike të Kosovës në rast se ajo profilizohet si e djathë, Haradinaj theksoi “Është në vullnetin politik të PDK-së të vendos nëse ata profilizohen si parti e djathtë. Ky do të ishte një avancim në skenën politike, por Aleanca dhe koncepti ynë qeverisës dallon me konceptin e sotëm të PDK-së në shumë aspekte. E them edhe njëherë besoj shumë që në të mirën e vendit është që vendit me i dhanë një qeveri përmes të cilës qytetarët munden me pa qeverisjen e sotme Thaçi sa e dëmshme është, dhe një qeveri Haradinaj sa e dobishme do të jetë për vendin”.