Terrorizmi, kush është''bin Ladeni'' i Internetit

nga **Agim Gashi** Sat Jun 12, 2010 8:14 pm

Terrorizmi, kush është''bin Ladeni'' i Internetit

Denis MacEoin, Reporter i Lindjes së Mesme
Ndërkohë që Jemeni po fiton ngadalë reputacionin e bazës së tretë të Al-Qaedës, është e mundur që Awlaki të shfaqet përsëri në skenë për të luajtur rolin drejtues në aktivitetin e rekrutimit

"Ne do vendosim vullnetin e Zotit në tokë me majën e shpatës". Këto janë disa ndër fjalët e shumta që dalin nga pena dhe goja e një lideri të terrorizmit islamik. Anwar al-Awlaki nuk është aq i njohur në Perëndim sa Osama bin Laden, por për komunitetin gjithnjë në rritje të myslimanëve radikalë dhe ekstremistë, ai është një pikë referimi. Osama bin Laden nuk flet anglisht rrjedhshëm, por Awlaki është biri i prindërve nga Jemeni i lindur në Amerikë (në Meksikën e Re) dhe flet rrjedhshëm arabishten dhe anglishten gjithashtu. Ai është një orator tejmase dinak dhe frymëzues për ndjekësit e tij, i cili i drejtohet drejtpërsëdrejti myslimanëve të rinj që jetojnë në Perëndim për të kthyer në myslimanë ekstremistë edhe ata që nuk kanë lindur të tillë. Tërheqja dhe ndikimi i tij është aq i fuqishëm saqë është etiketuar si "bin Laden i internetit", madje në vitin 2009 është emëruar komandant rajonal i Al-Qaedës në Jemen.
Me rrënjë të thella në Jemen, Awlaki aktualisht fshihet në një cep të errët të atij vendi. Megjithatë, pavarësisht maskimit me të cilin ka dashur të mbulohej, aktiviteti i tij i ndyrë u zbulua në vitin 2008 pas masakrës në Ford Hood, kur u bë e ditur se terroristi Nidal Malik Hasan kishte mbajtur kontakte të ngushta me të. Që nga viti 2008 deri në vitin 2009, janë shkëmbyer të paktën tetëmbëdhjetë e-maile ndërmjet të dyve. Pas masakrës, Awlaki i justifikoi veprimet e Hasanit duke thënë: "Për shkak se misioni u planifikua prej tij (Nidal Hasan) dhe bëhej fjalë për një plan ushtarak brenda Shteteve të Bashkuara, nuk ka asnjë dyshim që ishte diçka e drejtë". Awlaki vazhdoi më pas ta lavdëronte Hasanin, duke i përshkruar krimet e tij si të drejta:
"Nidal Hasan është një hero. Ai është një burrë me ndërgjegjje, i cili nuk duron dot të jetojë si mysliman dhe ndërkohë t'i shërbejë një ushtrie që lufton kundër njerëzve të tij… Çdo mysliman i ndershëm që kupton më së miri detyrat e tij kundrejt Krijuesit dhe vëllezërve të tij myslimanë nuk do të jetonte duke i shërbyer ushtarëve amerikanë. Shtetet e Bashkuara kanë nisur luftën kundër terrorizmit, e cila në realitet është një luftë kundër islamit. Ushtria e saj po sulmon drejtpërsëdrejti dy vende myslimane dhe po mundohet të mbajë nën kontroll pjesën tjetër duke ushtruar presion psikologjik…"
Nidal vrau ushtarët të cilët po niseshin për t'u pozicionuar në Irak dhe Afganistan. Si mund të ketë dyshime rreth virtytit të veprimeve të tij? Në fakt, e vetmja mënyrë që një mysliman mund të justifikojë islamikisht shërbimin e tij në ushtrinë amerikane është që të ndjekë hapat e njerëzve si Nidali. Akti heroik i vëlla Nidalit gjithashtu ka shfaqur dilemën e një komuniteti myslimano-amerikan. Bindjet e tyre po shkunden thellë duke e ditur që e vetmja mënyrë për të jetuar në paqe është: ose të tradhëtojnë islamin ose të tradhëtojnë kombin…
Asnjë dijetar me një grimcë njohurie islamike nuk mund të mohojë faktin që myslimanët e sotëm kanë të drejtë, më saktë kanë për detyrë të luftojnë kundër tiranisë amerikane.
Pozicioni i Awlakit si dijetar
Awlaki ka një reputacion mbarëbotëror si një klerik. Nidal Malik Hasan hiqej sikur kontaktonte me të për "udhëheqje shpirtërore" edhe pse tashmë është mëse e qartë që këshillat e Awlakit e tejkalonin kufirin e mbrojtjes së Juhadit.
Hyrjet e fjalimeve të Awlakit, zakonisht e paraqesin atë si një njeri të ditur. Atij i është caktuar disa herë titulli "imam" dhe tashmë konsiderohet si "dijetar mysliman". Në një filmim, ai paraqitet i ulur përpara një teksti islamik, një Kur'an, ose një libër i shekullit XIII i shkruar nga dijetari mysliman Ibn Taymiyya, duke lexuar tekstin në arabisht edhe duke e përkthyer atë në anglisht. Ai gjithashtu ka shërbyer si imam në Fort Collins, Colorado, në xhaminë Al-Ribat al-Islami në san Diego (1996-2000), në xhaminë Dar al-Hijrah në Uashington dhe gjithashtu si kapelan mysliman në Universitetin George Washington. Fjalimet dhe shkrimet e tij mund të gjenden kudo nëpër libra, Cd dhe nëpër vidjo në YouTube.
Pavarësisht rrënjëve dhe lidhjeve të tij amerikane, qëndron gjerësisht në vijën kryesore të nxitësve të xhihadit të dhunshëm të të gjitha mënyrave. Influenca e tij mund të provohet edhe nga fakti se klipet e tij janë parë nga tre milionë persona dhe gjithashtu nga një vërshim i madh komentesh të zjarrta që lavdërojnë këshillat e tij për të vrarë jobesimtarët, veçanërisht trupat amerikane apo izraelite. Si pasojë, ai është akuzuar se është një "koordinator, një nxitës ose nëse doni mund ta quani edhe rekrutues i të gjithë alQaedës dhe terrorizmave të saj", edhe pse roli i tij mund të jetë më pak formal se kaq.
Sipas Fondacionit NEFA të New Yorkut (Nine Eleven Finding Answers Foundation), të dhënat e kërkimeve dhe studimeve rreth terrorizmit tregojnë se: "Nuk ka asnjë figurë tjetër amerikane, pro alQaedës që mund të katë një akses kaq të gjerë në audiencë dhe që ka kaq shumë kredibilitet". Gazetari Scott Shane i "New York Times" raporton se, "Gati në një dyzinë rastesh të fundit të terrorizmit në Shtetet e Bashkuara, Britani dhe Kanada, investigatorët kanë zbuluar se të dyshuarit kishin të gjithë diçka të përbashkët: devocioni ndaj mesazhit të Anwar al-Awlaki".
Në grupet dhe individët e përfshirë në këtë investigim bëjnë pjesë edhe tre nga kamikazët e 11 shtatorit; "Toronto 18" (2006); Shain Duka, një nga komplotistët e Fort Dix (2007); anëtarët në Somali të Al-Qaedës, Al-Shabaab; Nidal Malik Hasan (2009); Mohammed Hamid arrestuar nën akuzën e organizimit të kampeve përgatitore për terroristët; dhe kohët e fundit, bombarduesin e Nigerisë, Umar Farouk Abdulmutallab.
Ndërkohë, ashtu si operativët e Al-Qaedës dhe bashkëpunëtorët e tjerë ekstremistë, Awlaki ka kredenciale shumë të dobëta për të qenë dijetar islamik. Ashtu siç ka pranuar edhe ai vetë, edukimi i tij në fenë islame kufizohet vetëm në disa muaj studime aty e këtu me ulema (dijetarë myslimanë) të ndryshëm. Disa muaj është një periudhë tejmase e shkurtër për t'i dedikuar një studimi serioz, veçanërisht për të studiuar tekstet klasike, të cilat pretendon se ka lexuar. Por, "lustra" e jashtme e edukimit të Awlakit e kombinuar me mungesën e tij të formalitetit mund të ketë qenë pikërisht çelësi i suksesit të tij. Ai nuk mban me vete valixhen e një dijetari të zakonshëm, por flet një anglishte të rregullt të pasuruar gjithashtu me citime në arabisht që tregojnë në sipërfaqe njohuri për Kur'anin dhe tekstet e tjera islamike. Në konferencën e tij të famshme, "Pluhuri kurrë nuk do të zhduket" për shembull, ai adreson pyetjen se çfarë duhet bërë me jobesimtarët që ofendojnë Profetin Muhammed në çdo lloj mënyre, duke e ilustruar temën e tij me raste të shumta të ngjashme, kur Profeti kishte urdhëruar ose lejuar vrasjen e poetëve apo njerëzve të tjerë që e kishin ofenduar. Me tone të matura dhe të rrjedhshme, ai lë përshtypje të fuqishme dijesh, të njohjes së thellë të materialeve bazë dhe të teksteve arabike duke i ilustruar gjithashtu me një bazë të fuqishme historike. Awlaki arrin të bëhet aq i besueshëm sa për të bindur masën që aktet e tradhtisë së hapur dhe ekzekutimit, kryhen për hir të virtyteve religjioze, madje në hyrjen e një faqeje interneti në shkurt ai kishte cituar: "I lutem Allahut që të shkatërrojë Amerikën dhe të gjithë aleatët e saj".
Të predikosh urrejtjen
Pasi kishte jetuar një kohë shumë të gjatë në Shtetet e Bashkuara, Awlaki u largua për të jetuar në Londër. Atje ai ndërmori një sërë konferencash në xhaminë e Al-Tawhid, një qendër e famshme e predikimit radikal. Reputacioni i tij duket se është ngjitur me shpejtësi. Në korrik të vitit 2003, rreth një vit pasi kishte arritur në Londër, ai ishte ftuar në një mbledhje të Shoqatës Myslimane në Britani (MAB), krahu zyrtar i Vëllazërisë Myslimane në Mbretërinë e Bashkuar. Pasi kjo shoqatë kishte organizuar për të një sërë konferencash ku ai mbante fjalimet e tij, në tetor të të njëjtit vit, Forumi Islamik i Evropës (IFE), një grup madhor me qendra në të gjithë Evropën, e ftoi Awlakin të mbante një fjalim në një event shumë të rëndësishëm. Më pas e ftuan në xhaminë e Londrës Lindore, një qendër e lidhur me IFE, e cila ka reputacionin e radikalizmit të stilit Deobandi dhe gjithashtu mban lidhje të ngushta me dy fondamentalistët më të mëdhenj të shekullit XX, Abu'l-'Ala Mawdudi dhe Sayyid Qutb. Akoma më shqetësuese, janë lidhjet e Awlakit me shoqëritë islamike të vendeve të ndryshme të edukimit të lartë ku përfshihen City University, Westminster University, Universiteti i Londrës dhe Federata e Shoqërisë së Studentëve Islamikë (FOSIS). Që nga ajo kohë, ai është vlerësuar dhe lavdëruar nga shumë shoqëri islamike të respektuara në Mbretërinë e Bashkuar.
Situata është bërë edhe më e agravuar kur Awlaki kishte lënë përshtypje pozitive tek disa individë, të cilët luftojnë të pastrojnë emrin e islamit nga ekstremizmi dhe terrorizmi, përfshirë këtu edhe Osama Saeed, shef ekzekutiv i Fondacionit Islamik Skocez dhe gjithashtu kandidat parlamentar në zgjedhjet e vitit 2010. Saeed deklaroi se Awlaki "nuk predikonte asgjë tjetër përveç paqes". Azad Ali, president i Shoqërisë Islamike të Shërbimit Civil, një anëtar i këshillit të grupit të djathtë Liberty dhe këshilltar për ekstremizmin islamik i një paneli kundërterrorizmi të Whitehall, i cili i jep këshilla drejtuesve britanikë të ndjekjeve penale dhe prokurorëve më të rëndësishëm, deklaroi hapur të gjithë dashamirësinë dhe admirimin e tij për Awlakin dhe e përshkruajti atë si "një nga folësit dhe dijetarët e tij të preferuar." Të dy këta burra e hodhën poshtë Awlakin pasi u bënë publike implikimet e tij në terrorizën gjatë vitit 2009.
Lidhjet e Awlakit me Saeed dhe Ali u bënë shkak për kritika dhe në vitin 2003 Louise Ellman, anëtare e Parlamentit britanik, ngriti çështjen e marrëdhënieve të tij me Shoqëritë Myslimane të Britanisë me Parlamentin teksa fliste për lidhjet midis grupeve të islamizmit radikal dhe anti-semitizmit: "Kishte ardhur koha që vëmendja të përqendrohej në Shoqërinë Myslimane të Britanisë, veçanërisht në figurat e saj kryesore si Azzam Tamimi, Kamal el Helbawy, Anas Al-Tikriti dhe Mohammed Sawalha. Të gjithë këto emra janë të lidhur me organizatën terroriste Hamas. Shoqëria Myslimane e Britanisë është një degë e Vëllazërisë Myslimane… Janë anti-semitikë militantë dhe gjithmonë kanë qenë. Në korrik të vitit 2003, Shoqëria Myslimane e Britanisë organizoi një sërë mbledhjesh me një imam amerikan, Anwar Al Awlaki, i cili ishte ftuar për të mbajtur fjalim. Ai zotëri është kërkuar disa herë për t'u marrë në pyetje nga FBI-ja në lidhje me sulmin terrorist të Al-Qaedës të 11 shtatorit".
Fakti që fama e tij e keqe kishte arritur deri në Parlamentin britanik, mund ta ketë trembur Awlakin, i cili ka menduar më pas se nëse qëndronte më shumë kohë në Mbretërinë e Bashkuar do të ishte përballur me hetime të imtësishme nga shërbimet e sigurisë britanike ashtu siç kishte ndodhur edhe në Shtetet e Bashkuara. Ai e braktisi Britaninë në fillim të vitit 2004, duke fluturuar bashkë me gruan dhe pesë fëmijët e tij drejt Jemenit. Aty u vendos në shtëpinë e tij të trashëguar në një provincë jugore të quajtur Shabwa. Më pas filloi të jepte leksione në San'a's Iman University, një institucion i themeluar dhe financuar nga Abdul-Majid az-Zindani, një terrorist i akuzuar nga U.S. Treasury dhe një përkrahës i Al-Qaedës i dënuar nga Kombet e Bashkuara. Universiteti është një institucion me 6.000 studentë dhe në fakt është një medrese ose shkollë për mësimin e fesë islamike.
Arrestimi në Jemen
Gjërat morën një kthesë të re më 31 gusht 2006 kur Awlaki u arrestua nga një polic në Jemen. Ka patur debate shumë të ashpra rreth arsyeve të arrestimit të tij, por një shpjegim racional do të ishte që Uashingtoni kishte bindur Jemenin ta mbante atë nën mbikëqyerje duke i dhënë mundësinë për ta ekstraduar. Në një intervistë për "Cageprisoners" të bërë nga një ish i burgosur në Guantánamo Bay, Moazzam Begg, Awlaki pranoi se ishte marrë në pyetje nga FBI-ja. Interrogimi, deklaron ai, u krye disa herë për një vit.
Cilido qoftë rezultati i këtyre intervistave, nuk u krye asnjë akuzë dhe Awlaki u lëshua më 12 dhjetor 2007. Ndoshta për të mbrojtur atë është përdorur influenca politike pasi emri i tij është gjetur në listën e 100 të burgosurve që u liruan me kërkesë të militantëve të Al-Qaedës në Jemen, tek të cilët Awlaki ka një ndikim të jashtëzakonshëm. Kuptohet që Awlaki ka siguruar mbrojtje për Al-Qaedën kundër qeverisë dhe tashmë mendohet se jeton në shtëpinë e tij në provincë me të njëjtën lloj mbrojtje.
Këshilltari i vrasjeve masive
Roli i Awlakit si një nxitës i dhunës, është reklamuar më tej më 25 dhjetor 2009 kur u tentua të rrëzohej një avion gjatë uljes së tij në Detroit. Myslimani Nigerian Umar Farouk Abdulmutallab, përgjegjës për bombardimin që fatmirësisht u shmang, mendohet se është takuar me Awlakin, ndërkohë që studionte në Universitetin Imam në San'a dhe duket se ka qenë adhurues i flaktë i leksioneve të tij. Një raport tregon se Abdulmutallab i tha FBI-së se Awlaki ka qenë mësuesi i tij në një kamp të largët të Al-Qaedës në Jemen dhe se ishin takuar shpesh gjatë javëve finale të stërvitjes dhe indoktrinimit të tij.
Për një kohë të shkurtër mendohej se Awlaki ishte vrarë në një sulm më 24 dhjetor 2009, kur raketat e Jemenit u përpalsën në një mbledhje të operativëve të Al-Qaedës. Sulmi vrau rreth tridhjetë militantë duke përfshirë edhe Nasser al-Wuhayshi, lider rajonal i Al-Qaedës dhe delegatin e tij Saeed ash-Shihri. Megjithatë, dy ditë më vonë FBI-ja deklaroi se nuk besonte që Awlaki të kishte qenë mes viktimave.
Mesa duket mund të themi se Anwar al-Awlaki është një nga zëdhënësit më të suksesshëm të radikalizmit islamik, duke përsorur një gjuhë jo islamike dhe teknologji moderne për të përhapur mesazhin e tij sa më gjerësisht. Ai ka qenë aq dinak sa për të mos kryer asgjë drejtpërdrejt kriminale dhe kompromentuese, por është mëse e qartë që i arrin qëllimet e veta me anë të manipulimit të të tjerëve, të njerëzve si Nidal Malik Hasan dhe Umar Farouk Abdulmutallab. Kur ai predikon radikalët, rezultati është gjithmonë konfirmimi i të drejtës së tyre religjioze për të vrarë jo-myslimanët. Kur myslimanët e butë dhe jo ekstremistë dëgjojnë Cd-të e tij dhe publikimet në internet, erudicioni, bindja dhe aftësia e tij retorike për t'i bërë njerëzit të ndihen në faj ose sikur po tradhtojnë idealet e tyre, bashkohen së bashku për të krijuar përshtypjen se është e drejtë që në emër të Zotit të flasësh në atë mënyrë dhe të kryesh veprime të dhunshme. Ndërkohë që Jemeni po fiton ngadalë reputacionin e bazës së tretë të Al-Qaedës, është e mundur që Awlaki të shfaqet përsëri në skenë për të luajtur rolin drejtues në aktivitetin e rekrutimit dhe nxitjes së myslimanëve të rinj të indoktrinuar jo vetëm në Jemen, por në të gjithë botën. Njerëzit si Anwar al-Awlaki po e bëjnë botën një vend të pasigurt për të jetuar, jo vetëm për jo-myslimanët.
Përgatiti
KLARITA BAJRAKTARI

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31