Adem Berisha: PREZANTIM: LULJA LA LULISHTEN

nga **Agim Gashi** Mon Jun 14, 2010 10:25 pm

Adem Berisha: PREZANTIM: LULJA LA LULISHTEN

Kopertina e librit tim të dyte i cili në tërësi i është kushtuar mbesës time të dashur DIELLZA BERISHA (29. 09. 1995 - 28. 06. 2006.) që doli nga shtypi më 12. 06. 2010. prej dy ciklesh: a) Kuptoje dhimbjen time dhe b) Zemërbardhët për Diellzen.

LULJA LA LULISHTEN
KONTRIBUT MODEST KRIJIMTARISË ELEGJIKE, JO EDHE AQ TË PASUR SHQIPTARE

Motra e vëllezër të dashur, miq të respektuar, dashamirë të fjalës së shkruar dhe gjithë lexuesit që në vazhdimësi përcollën dhe lexuan shkrimet e mia modeste nga përmbledhja ime poetike “Krenaria dhe pikëllimi”, kush nga libri e kush nga forume dhe faqe të ndryshme të internetit, duke qenë mirënjohës për komentet dhe vlerësimet tuaja, JU njoftoj se sot më datën 12 qershor 2010, doli nga shtypi libri im i dytë “LULJA LA LULISHTEN” botuar nga Shtëpia botuese- shtypshkronja “BERATI” në Prizren.
Trendi i shkrimeve të mia pas botimit të përmbledhjes “Krenaria dhe pikëllimi” me poezi natyrash dhe temash të ndryshme nga aspekti krijues-letrar, pësoi një goditje me rastin e ndarjes tragjike nga jeta të mbesës time të dashur Diellza Berisha (29. 09. 1995 – 28. 06. 2006.) kështuqë kjo humbje e pa kompenzueshme për mua, familjen time dhe gjithë të dashurit e saj, ngulfati gjithë idetë e mia krijuese për të vazhduar me krijimtarinë time modeste. Në këtë situatë, ishte e pashmangshme shfaqja e dhimbjes dhe pikëllimit edhe përmes vargjeve poetike në formë vrushkujsh elegjikë kështuqë nxora këtë libër i cili në tërësi i kushtohet kësaj engjëllushe të dashur e cila pa fajin e saj nuk arriti të shijojë dhe gëzojë bukuritë dhe ëmbëlsitë që jeta mund të ofrojë.
Libri është i strukturuar dhe ndarë në dy cikle poetike: a) Kuptoje dhimbjen time dhe b) Zemërbardhët për Diellzen. Nga vet ky strukturim i librit nënkuptohet se mallin, dashurinë por edhe pikëllimin për këtë engjëllushë, përmes vargjeve të tyre e kanë shfaqur një numër i madh motrash e vëllezërish nga gjithë trevat shqiptare por edhe diaspora gjithandej globit duke u bërë njëherit edhe bashkautor të mi të respektuar.
Edhe me këtë rast dua qe të shpreh falënderimet e mia dhe mirënjohjen time të thellë për gjithë motrat e vëllezërit të cilët në cilëndo mënyrë më ngushëlluan, u solidarizuan me mua dhe përmes vargjeve të tyre shfaqen ndjenjat e tyre të dashurisë, dhimbjes dhe pikëllimit. Falënderoj edhe gjithë të tjerët të cilët sigurisht që do të donin por që nuk kanë pasur rastin apo mundësinë për shprehjen e ndjesive të tyre. Falënderoj me gjithë zemër zonjën e respektuar, shkrimtaren, publicisten dhe veprimtaren e shquar të çështjes kombëtare e gruan e vitit 2008, Këze (Kozeta) Zylo, tepelenase nga New Yorku si redaktore e librit e cila njëkohësisht është edhe autore e dy poezive të mrekullueshme kushtuar engjëllushes Diellza. Poashtu falënderoj edhe shkrimtaren e shquar zonjën Fatime Kulli për kontributin e saj të çmuar poshtu në redaktimin e librit si dhe shkrimtarin e shquar drenicas Halil Xani për angazhimin dhe lektorimin e librit. Falënderoj edhe shtëpinë botuese “Berati” nga Prizreni me pronar Begri Avdullahun për botimin dhe kontributin e konsiderueshëm në përcaktimin e çmimit me rastin e botimit. Falënderoj familjen time për mbështetjen e gjithanshme si dhe gjithë miqtë e dashamirët që në cilëndo mënyrë ndihmuan botimin e librit.
Për kënaqësinë dhe kurreshtjen tuaj motra e vëllezër të dashur, po vendos këtu poezinë e parë të këtij libri “Vajza dhe miku”.

VAJZA DHE MIKU

Një ditë Diellza e vogël
kur doli në qytet,
ndaloi në librarinë në kodër
të gjente mikun e vet.

Si vajzë e edukuar
librashitësin përshëndetë,
më gjej tha mikun tim të çmuar
të lutem sa mundesh më shpejtë.

Librashitësi nga një qoshe
shikon pak si me habi,
vajzë moj bukuroshe
çfarë miku këtu kërkon ti?!

Ty oj pëllumbeshë e bukur
xhaxhi nuk po të kupton,
më bëj pak më të qartë të lutem
që xhaxhi të ndihmon.

Po, vajza drejtoi shikimin,
përgjigjja është e lehtë:
mik më të madh se librin
askënd nuk kam në jetë.

Ma gjej pra të lutem
Kryeveprën, “Lahuta e Malësisë”,
askush si At Gjergji e Naimi
s’më flet për të mirat e Shqipërisë.

Për mua kjo qenka punë e lehtë
ndaj, xhaxhi nuk të le duarthatë,
t’i bësh ti mbi njëqind vjet,
në jetë të kesh shumë fat.

Kështu diellzusha e vogël
mikun shpejt e gjeti,
me ‘i lamtumirë të ëmbël
librashitësin përshëndeti.

Kater vite shkuan
Të rënda shumë,
Ti je e gjallë se Engjujt nuk vdesin
Këtë ia kam thënë Bacës Adem unë!
(A.G.)

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30