LDK-ja pa unitet veprimi

LDK-ja pa unitet veprimi

Isuf Bytyçi, BOTA SOT
Krerët e LDK bashkëbisedojnë me anëtarësinë për të ardhmen e partisë





LDK-ja, humbi zgjedhjet jo për mungesë potenciali, por për shkak se prioritet e kishte pavarësimin e vendit, dhe po ashtu edhe për shkak të ndarjes së partisë.
“Në zgjedhje patëm hyrë pa “ajam”, pasi prioritet e kishim realizimin e aspiratës parësore për shtetin e pavarur të Kosovës”, tha zëvendëskryeministri Ramë Manaj, gjatë një takimi zyrtar në Malishevë. Manaj, sekretar i përgjithshëm i LDK-së, ka pranuar se humbja ishte edhe rezultat i rivalitetit përbrenda LDK-së, që çoi në ndarjen e partisë. Manaj tha se LDK-ja, mundet dhe duhet ta kthejë kredibilitetin e të parit dhe rastin për këtë e ka në vjeshtën e këtij viti, kur pritet të mbahen zgjedhjet për pushtetin lokal. Ai tha se LDK-ja nuk ka shmangie nga filozofia politike e themeluesit të LDK-së, presidentit historik Dr. Ibrahim Rugova. “Por, tani ka vetëm forma të realizimit të objektivave, si pjesë e demokracisë në proces”, tha ai. Manaj, tha se pas realizimit të Pavarësisë, moto e kësaj partie është ngritja e shtetit, forcimi, fuqizimi i institucioneve, prosperitetit, mirëqenia e popullit dhe integrimi i shtetit të Kosovës. Ai tha se krahas reformave në parti, synohet të ketë edhe prurje të reja në strukturat e LDK-së.
Sadri Ferati, tha se ndër vendimet e kryesisë së LDK-së, është edhe identifikimi i gabimeve, i mos koordinimit, e mos komunikimit si dhe të potencialit për të vazhduar me strategjinë e veprimit sipas një programi profilizues, të hartuar nga ekspertët e partisë dhe nga partnerë ndërkombëtarë.
Zëvendësminitri i Tregtisë dhe Industrisë, Januz Kastrati, kryetar i Degës së LDK-së dhe anëtar i KP të LDK-së, ndërsa falënderoi bashkatdhetarët për ndihmën dhe përkushtimin e tyre për të ndihmuar Kosovën, por edhe LDK-në, tha se kjo parti po reformohet dhe se do t’ia arrijë ta rikthejë imazhin e saj.
Edhe afaristi Ramë Rrahmanaj, veprimtar i LDK-së, që nga themelimi i saj, u zotua se do ta ndihmojë edhe në të ardhmen, veprimtarinë e kësaj partie. “Ju veç punoni, sepse mjetet financiare, nuk do t’u mungojnë, iu drejtua ky afarist-veprimtar kreut të LDK-së, duke i sugjeruar që ata me shokë të punojnë, të angazhohen seriozisht e me përkushtim maksimal për rezultate konkrete, sa më pak fjalë dëshpëruese. Forcimi i LDK-së dhe rikthimi i primatit politik të saj në republikën e Kosovës, duhet të jetë qëllimi kryesor yni dhe kjo mund të arrihet vetëm falë punës së përbashkët, unitetit e përkushtimit sa më të madh”, tha veprimtari Rrahmanaj.
Adem Krasniqi, nga Pagarusha, tha se është e domosdoshme për zgjedhjen e kuadrove më të afta në institucione. Ndërsa, Hamdi Mazreku, deputet lokal në Kuvend, tha se sa ishte gjallë presidenti Rugova, LDK ishte parti e kredibilitetit. Veprimtari Rrahman Kastrati u tha zyrtarëve nga Prishtina, se më “nuk mund të thirren në emrin e të madhit Ibrahim Rugova”.
Në takimin e zgjeruar të Degës së LDK-së në Malishevë, ku u paralajmërua rikthimi në LDK i ish aktivistëve e anëtarëve të LDK-së që patën kaluar në LDD, u vlerësua se ky është një sinjal i mrekullueshëm për fuqizimin e LDK-së.
Një delegacion i kryesisë së Degës së LDK-së në Malishevë, para se takimit, bënë homazhe te varri i presidentit Rugova.