Ditë të këqija për Nexhat Dacin

nga **Agim Gashi** Thu Jun 17, 2010 2:44 am

Nexhat Daci (Foto: Fisnik Dobreci)
Ditë të këqija për Nexhat Dacin
Nga partia e Nexhat Dacit të martën u largua edhe anëtari i Kryesisë Qendrore, Sabri Morina. Ai tha se ka informacione se deri në fund të qershorit komplet LDD’ja do t’i bashkohet LDK’së. Këto informacione mohohen nga Lulzim Zeneli

Nga Faton Ismajli më 16.06.2010 në ora 10:05

Partia e themeluar nga Nexhat Daci po vazhdon të rrënohet dhe kësaj më së shumti po i ndihmon Partia e Fatmir Sejdiut, e cili i ka hapur dyert për zyrtarët e LDD’së.
Kështu, të martën, nga organi vendimmarrës i LDD’së ka ikur Sabri Morina, duke shënuar zyrtarin e tretë që largohet brenda dy ditësh.

Ish-anëtari i Kryesisë Qendrore të LDD’së, Sabri Morina ka thënë se vendimin për të kaluar në LDK e ka marrë nga kërkesa e elektoratit për t’iu bashkuar Fatmir Sejdiut.
“Mendoj se është e nevojshme që të bëhet një konsolidim i gjithëmbarshëm politik, në rend të parë të elektoratit dhe të simpatizantëve rugovistë, i cili tashmë nuk duron asnjë ndarje, por kërkon vetëm bashkim. Këtij zëri edhe po i përgjigjem”, shkruan Morina, në letrën publike të dorëheqjes.

Ai ka dhënë parashikime të zeza për LDD’në, duke paralajmëruar se deri në fund të muajit qershor, do të ndodhë kalimi i krejt LDD’së në LDK.

“Unë kam informata se në mbledhjen e Kryesisë Qendrore që është mbajtur të hënën, nga katërmbëdhjetë anëtarë - vetëm një e ka kundërshtuar bashkimin e LDD’së me LDK’në. Sipas informatave që kam unë, deri në fund të qershorit, LDD’ja do të bashkohet me LDK’në”, ka thënë Morina, për Express, të martën.

Këto deklarata të ish-anëtarit të Kryesisë së LDD’së janë hedhur poshtë nga Nënkryetari Lulëzim Zeneli.

“Kryesia nuk është mbledhur të hënën, por është mbledhur sot (e martë) dhe nuk është diskutuar fare për bashkimin me LDK’në. Dihet se rruga e LDD’së është e qartë dhe e sigurt për të vazhduar me reforma”, ka thënë Nënkryetari i LDD’së, Lulëzim Zeneli.

Ndryshe, Lidhja Demokratike e Dardanisë po vazhdon të mos këndellet nga disfata që pësoi në zgjedhjet lokale të vitit të kaluar. Kjo parti pati rënie të elektoratit, çka ndikoi që disa anëtarë të Kryesisë së saj t’i drejtojnë shigjetat kah Nexhat Daci.

Ai u akuzua se zhgënjeu elektoratin e tij kur vendosi të garonte së bashku me AKR’në në shumë komuna, derisa publikisht disa udhëheqës të LDD’së i kërkuan që të mendojë për një bashkëpunim me LDK’në.

Megjithëse Daci i ka zgjatur dorën e bashkëpunimit me ish-partinë e tij, zyrtarët e LDK’së i janë përgjigjur negativisht ofertës së LDD’së për marrëveshje parazgjedhore me arsyen se nuk është koha e koalicioneve.

Injorimi i Fatmir Sejdiut ndaj kërkesës së Nexhat Dacit duket të jetë hap i menduar mirë, pasi zyrtarët e LDD’së vazhduan të kalojnë individualisht në LDK.

Mirëpo, edhe Nexhat Daci, në Konventën e muajit maj, përjashtoi disa nga themeluesit e LDD’së, duke përfshirë Adem Salihajn dhe Tomë Hajdarajn.

Kjo situatë pashmangshëm ngre pikëpyetje për të ardhmen e LDD’së.

Por, këto dilema shpërfillen nga Lulzim Zeneli.

“LDD’ja është e madhe në raport me interesat individuale të njerëzve të caktuar. LDD’ja po vazhdon me reforma dhe njerëz që nuk e shohin veten pjesë të këtij procesi po largohen”, ka thënë Nënkryetari i LDD’së, për Express, të martën.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30