Ligjvënësit kërkojnë ligj për Ombudspersonin

Ligjvënësit kërkojnë ligj për Ombudspersonin







Nga Express më 24.02.2009 në ora 19:18

Deputetë kosovarë e konsiderojnë si hap të ngutshëm, vendimin e Kryesisë së Kuvendit për shpalljen për herë të pestë, të konkursit për Ombudsperson, pa miratimin e ligjit përkatës.

Ibrahim Makolli i AKR-së tha se pas dështimit qe katër herë ta zgjidhë Avokatin e Popullit, Kuvendi i Kosovës tashmë e ka humbur kredibilitetin si një institucion që zgjidhë probleme.

Sipas agjencisë KosovaLive, në një debat të organizuar nga Nisma e të Rinjve për të Drejtat e Njeriut (YIHR), Makolli theksoi se janë bërë katër herë që vazhdon e njëjta situatë me të njëjtit kandidatë. Prandaj sipas këtij deputeti opozitar, Kryesia e Kuvendit është ngutur kur ka shpallur konkursin, pa i mënjanuar mangësitë që janë shfaqur herëve të tjera dhe pa miratimin e Ligjit për Ombudspersonin.

Gjithashtu Makolli mendon se duhet të bëhen ndryshime në Rregulloren e zgjedhjes së Ombudspersonit, pasi që kështu si është, rregullorja e bënë pothuaj të pamundur zgjedhjen e përfaqësuesit të këtij institucioni të rëndësishëm. “Është një rreth vicioz, nga i cili është shumë vështirë të dilet”, ka thënë Makolli, i cili edhe vetë ka qenë kandidat për Ombudsperson në vitin 2006.

Ngjashëm sikurse Makolli, edhe Ardian Gjini i AAK-së e konsideron si jonormale që sërish në konkursin e ri të kandidojnë njerëz që kanë kandiduar edhe herëve të tjera dhe që kanë dështuar të zgjidhen.

Gjini konsideron se zgjedhja e Avokatit të Popullit është çështje politike, për faktin se gjatë votimit ligjvënësit kanë votuar bllok për, kundër ose kanë abstenuar për kandidatë të caktuar.

Sipas tij, Kryesia është ngutur në këtë proces kur e ka shpallur konkursin, para se të eliminohen të gjitha konsekuencat politike për zgjedhjen e Ombudspersonit dhe mbylljen e kësaj odiseje 4-vjeçare.

Bahri Hyseni, kryetar i Komisionit për Legjislacion dhe Kushtetutë, tha se zgjidhja e Avokatit të Popullit nuk është çështje politike dhe nuk duhet të jetë çështje politike, ndërsa gjatë katër herëve të kaluara, sipas tij, Kuvendi ka respektuar parimet kushtetuese.

Hyseni tha se për zgjedhjen e Ombudspersonit nuk duhet të ketë koalicion partiak apo politik, sepse vetë Ombudspersoni do ta humbë kredibilitetin që duhet ta këtë.

Deputeti i PDK-së, ndërkaq kundërshtoi çdo mundësi që Komisioni t’i rekomandojë partive politike për të votuar ndonjërin nga kandidatët.