SHBA-të, arrestojnë 10 agjentë të dyshuar të Rusisë

nga **Agim Gashi** Tue Jun 29, 2010 8:06 pm

SHBA-të, arrestojnë 10 agjentë të dyshuar të Rusisë

Moska reagon për arrestimin e agjentëve

(E plotësuar) - Ministria e Jashtme e Rusisë tha se arrestimi i dhjetë spiunëve të dyshuar rusë në Shtetet e Bashkuara, është një rikthim i Luftës së Ftohtë.
Përmes një deklarate, ministria tha se akuzat e SHBA-ve janë të pabaza dhe kanë qëllime “të paqarta”.
Ministri i Jashtëm, Sergei Lavrov, deklaroi me sarkazëm të dukshëm se koha për arrestimet, është zgjedhur me kujdes të veçantë.
“Ata nuk na e kanë shpjeguar se me çfarë ka të bëjë kjo. Unë shpresoj se do ta bëjnë. Gjëja e vetme që mund të them është se momenti për t’i bërë këto, është zgjedhur me mjeshtri të veçantë”, ka thënë Lavrov.
Zyra Federeale e Hetimeve, FBI ka arrestuar 10 persona nën akuzat se kanë qenë agjentë sekretë të shërbimit rus të zbulimit. Qëllimi i të arrestuarve ishte depërtimi në rrethet e politikbërësve amerikanë. Lajmi është bërë i ditur nga Departamenti i Drejtësisë i SHBA-ve.
I akuzuari i njëmbëdhjetë, që i ka bërë pagesat dhjetë të arrestuarve, është në arrati.

Departamenti amerikan i Drejtësisë ka njoftuar arrestimin e 10 personave të akuzuar për spiunazh për Rusinë. Tetë nga të arrestuarit të dielën akuzohen për detyra me afat të gjatë spiunazhi në Shtetet e Bashkuara që punonin për Federatën Ruse. 11 njerëz akuzohen për përfshirje në celulën e spiunazhit, njërit ende nuk i dihet vendndodhja.
Sipas dokumenteve të gjykatës, Departamenti i Drejtësisë i përshkruan të akuzuarit, si ilegalë, synimi i të cilëve ishte amerikanizimi i mjaftueshëm në menyrë që ata të grumbullonin informata rreth Shteteve të Bashkuara për Rusinë.
Në dokumente thuhet se agjencia ruse e zbulimit SVR u kishte ngarkuar atyre misionin që të krijonin lidhje me qarqet e politikës në Shtetet e Bashkuara.
Arrestimet u kryen në Nju Jork, Nju Xhersi, Masaçusets dhe Virxhinia. Ndaj të gjithë të ndaluarve janë ngritur akuza për konspiracion për të vepruar si agjent të një qeverie të huaj pa njoftuar Prokurorin e Përgjithëshëm Amerikan. Po ashtu ndaj tetë të tjerëve janë ngritur akuza për pastrim parash.
Informacionet rreth arrestimit të një rrjeti spiunësh rusë në Shtetet e Bashkuara janë kontradiktore, deklaroi Ministria e Jashtme e Rusisë. Zëdhënësi i diplomacisë ruse tha se po analizohen akuzat e ngritura nga SHBA-të, derisa sherbimi rus i zbulimit nuk ka dashur të komentojë rreth arrestimeve.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30