Kabineti në Ethe

Kryeministri i Kosovës Hashim Thaçi (majtas) dhe zëvendëskryeministri Hajredin Kuqi. Foto: Jetmir Idrizi

Kabineti në Ethe
Zëvendëskryeministrat thonë se vlerësimi i punës së Qeverisë i takon vetëm Kryeministrit dhe jo kryesive të partive që marrin pjesë në koalicionin qeverisës. Thaçi po e mban në ethe Kabinetin e tij. Ai vetëm ka bërë paralajmërimin, por nuk ka sqaruar asgjë tjetër - as formën dhe as kohën e vlerësimit

Nga Leonard Kerquki më 26.02.2009 në ora 8:09

Kryeministri Hashim Thaçi ka paralajmëruar se së shpejti do të bëjë vlerësimin e performancës së anëtarëve të Kabinetit të tij, por është duke i mbajtur ata nën presion duke mos u treguar as kohën dhe as formën e këtij vlerësimi.

“Do të ketë vlerësim të performansës për Kabinetin Qeveritar në të ardhmen e afërt”, kishte thënë Thaçi në intervistën e botuar më 17 shkurt në Express. “Patjetër”, ka qenë përgjigjja e tij në pyetjen nëse ky vlerësim do të bëhet brenda këtij viti. “Kjo nënkupton vlerësim të punës së çdo Ministri dhe dikasteri qeveritar”.

Në qeveritë e mëhershme vlerësimi i punës së ministrave ka qenë gati i pamundur, pasi që është konsideruar se një proces i tillë mund të nxisë tensione mes partnerëve të koalicioneve qeverisëse.

Por kësaj radhe, duket se do të veprohet ndryshe. Dy zëvendëskryeministrat - Hajredin Kuçi dhe Ramë Manaj - kanë thënë se ky proces do të ndodhë brenda vitit.

“Është në dorën e Kryeministrit dhe besoj që ai do ta bëjë një gjë të tillë. Ne e dallojmë jo vetëm kuptimin e punës, por edhe të performacës së anëtarëve të kabinetit qeveritar. Por nuk mund të them asgjë më shumë, pasi që Kryeministri do ta bëjë vlerësimin edhe për mua, e jo vetëm për ministra”, ka thënë Kuçi për Express, të mërkurën.

Ngjashëm është shprehur edhe Manaj. “Do të ketë vlerësim të angazhimit, suksesit, rezultateve të punës të secilit anëtar të Qeverisë”, tha ai për Express.

Sipas zëvendëskryeministrave, vlerësimi i punës është e drejtë ekskluzive e Kryeministrit dhe jo e kryesive të partive që marrin pjesë në Qeveri. “Kryeministri është Shef i Qeverisë dhe ai vlerëson punën e secilit”, ka thënë Hajredin Kuçi.

“Partitë janë të implikuara sa i përket pozicioneve, por performacën e vlerëson Kryeministri. Sigurisht ai nuk denigron asnjë partner në qeverisje. Partitë i kanë të ndara vendet në Qeveri, por nuk i kanë të siguruar individët që i kanë dërguar aty”, ka shtuar Zëvendëskryeministri nga radhët e PDK’së.

Në Qeverinë e mëparshme, që drejtohej nga Agim Çeku, Zëvendëskryeministri Lutfi Haziri, që vinte nga LDK’ja, kishte për obligim që të bënte vlerësimin e punës së ministrave të partisë së tij.

Por Ramë Manaj, Zëvendëskryeministër nga radhët e LDK’së, thotë se aktualisht aplikohet një praktikë tjetër.

“Ne (Zëvendëskryeministrat) i kemi të ndarë punët në kuptim të integrimit. Por Qeveria është unike, ministritë janë në funksion të përbashkët. Nuk ka kurrfarë ndarje aty, mbi çfarëdo baze qoftë”, ka thënë ai.

Vlerësimin e punës së ministrave, sipas tij, e bën vetëm Qeveria e Kosovës. “Vlerësimi bëhet unik, pavarësisht se kush nga vjen. Bëhet mbi rezultatet e punës, mbi shkallën e angazhimit dhe shkallën e kontributit”, ka thënë ai.

“Kryeministri dhe Qeveria e bën vlerësimin, sepse është fjalë për angazhim institucional, mbi kompetencat që jep ligji”, ka shtuar Manaj.

PDK’ja dhe LDK’ja, edhe pse dikur parti të armiqësuara, hynë së bashku në një koalicion qeverisës, një vit më parë. Shkëndijat e para të tensionit janë reflektuar vetëm në një rast, kur Kryeministri Hashim Thaçi shkarkoi Naser Osmanin nga posti i Zëvendësministrit të Tregtisë. Ky veprim kishte nxitur reagime në Kryesinë e LDK’së.

Rasti është indikativ edhe tash. Megjithëkëtë, Ramë Manaj nuk dëshiron të paragjykojë.
“Unë nuk jam Profet që të flasë tash se çfarë mund të ndodhë. Por në bazë të eksperiencës së deritashme të bashkëpunimit mes partnerëve të koalicionit, nuk pres një gjë të tillë”, ka thënë Zëvendëskryeministri i LDK’së.

Kur pritet që të bëhet ky vlerësim? Zëdhënësi Memli Krasniqi nuk e di. “Kryeministri është Shef i Qeverisë dhe i gjithë ministrave. Kryeministri do ta vlerësojë punën e tyre dhe do t’i japë rekomandimet kur ai e sheh të udhës”, ka deklaruar Krasniqi.