Anjeza Shahini: Nxënësja më e mirë

Anjeza Shahini: Nxënësja më e mirë

Anjeza Shahini

Anjeza Shahini është një 20 vjeçare kryeneçe dhe e vendosur që të marrë sa më shumë. Kur i kërkon që të të japë një intervistë dëshiron të sigurohet se vëmendja që do t’i kushtohet do të përmbushë parametrat, që mendon e sigurt se i ka arritur. Tregohet e kujdesshme për çdo detaj që ka lidhje me marrëdhënien e saj me publikun qoftë edhe kur kjo marrëdhënie shkon jashtë interpretimit në skenë dhe faqoset në faqet e revistës më të madhe politike në vend. Ajo mendon se ka investuar mjaftueshëm dhe për këtë kërkon të ketë hapësirën që meriton në çdo medium që do të bjerë në dorën e publikut.
Por përtej mënyrës së vendosur për të marrë atë që kërkon, Anjeza ka në fakt një të drejtë thelbësore: të drejtën për të kuruar imazhin e saj. Për një 20 vjeçare që ka përfaqësuar deri tani Shqipërinë më mirë se kushdo tjetër në festivalin europian, për faktin që pikërisht në këtë moshë sapo ka fituar një çmim të Kritikës në “Kënga Magjike 2007” dhe për faktin tjetër që sapo është kthyer nga studimet profesionale për muzikë në Vjenë, pra për këto arsye, “kryeneçësia” e saj për të plotësuar punën e një specialisti PR të mirëfilltë, është mëse e justifikuar.
Anjeza nuk është ama një specialiste PR dhe nuk është thjesht një këngëtare e talentuar që kërkon t’i hedhë hapat e saj në mënyrë solide dhe të sigurt. Ajo është aktualisht një prej zërave më të dashur për publikun shqiptar dhe një prej shembujve të suksesit në skenë kur ky kombinohet me 70% punë e 30 të tjera talent. “Gjithmonë kam qenë e bindur që vetëm talenti nuk mjafton. Sigurisht që 70% të suksesit në çfardolloj profesioni i përket punës. Të gjithë ata që janë lumturuar vetëm me talentin kanë patur vështirësi në jetëgjatësinë e tyre në skenë”. Kështu shprehet ajo në të parën intervistë dhënë për shtypin shqiptar pas pjesëmarrjes në “Kënga Magjike” me këngën “Nxënësja më e mirë”. Në këtë këngë, ajo është “nxënësja më e mirë e trishtimit”, ndërkohë pa diskutim Anjeza është një prej nxënësve më të mira të spektaklit “Ethet…” realizuar nga Adi Krasta dhe Pali Kuke.
Pikërisht 5 vjet më parë ajo spikati me zërin e veçantë në një prej audicioneve të këtij spektakli. Mori në fillim disa vlerësime për zërin por duke qenë se ishte ndoshta më e veçanta atë vit në llojin e vet, mori dhe shumë kritika nga juria e “Etheve…”. Kritika që ajo, ndryshe nga shumë bashkëmoshatarë të tjerë të kënaqur vetëm me talentin, nuk mundën t’i përvetësonin. Një specialist i muzikës do ta kishte të lehtë të dallonte në zërin e saj disa nuanca që duheshin përpunuar, edhe dy vjet më parë kur ajo shkoi në Vjenë për të studiuar. I njëjti specialist mund të konstatojë i qetë tashmë pas kthimit te saj nga Viena, se edhe disa elementë të veckël që e pengonin përsosmërinë në formatin e saj artistik janë zhdukur! Anjeza është tashmë një këngëtare profesioniste e skenës shqiptare. Nuk ka ende një album, por e dini si përgjigjet ajo për këtë fakt: “Ajo që mund të them është se, fakti që gjer më sot nuk kam hedhur në treg një album timin, tregon që nuk jam ndjerë komode me tregun muzikor shqiptar”.
Ndonjëherë talenti dhe puna mund edhe të mos kombinohen dot suksesshëm, nëse ato të dyja nuk i lidh mbi të gjitha një karakter i fortë… “Kam zgjedhur fushën që Zoti më ka dhuruar, dhe kjo më jep një siguri në vetvete”, i jep vulën me karakterin e saj Anjeza Shahini, ish nxënësja më e mirë e skenës shqiptare që tashmë ka se çfarë u mëson të rinjve të tjerë që si ajo mund të dalin shpejt nga bankat e një shkolle që nuk premton dot asnjë siguri në tregun kaotik shqiptar...