Krasniqi: Nënë Tereza tejkaloi të gjitha dallimet njerëzore

nga **Agim Gashi** Thu Sep 02, 2010 9:14 pm

Krasniqi: Nënë Tereza tejkaloi të gjitha dallimet njerëzore

Kuvendi i Kosovës mbajti të enjten një seancë solemne për nder të 100-vjetorit të lindjes së Nënës Terezë, me ç’rast kryeparlamentari Jakup Krasniqi e quajti të jashtëzakonshëm dhe të papërsëritshëm fenomenin e quajtur “Nëna Terezë”.
Në fjalimin drejtuar deputetëve të Kuvendit si dhe mysafirëve të ftuar, Krasniqi tha se Kosova është krenare që nxori nga gjiri i saj një humaniste me përmasa kaq të mëdha botërore. Nënë Tereza, tha ai është një fenomen, me të cilin përfitoi dhe krenohet mbarë njerëzimi, të varfrit dhe të pasurit, të ngopurit dhe të pangopurit, besimtarët dhe jobesimtarët si dhe secili njeri, në të katër anët e globit.
“Nëna dhe motra jonë u bë dhe do të mbetet Nëna e të gjithëve në hapësirën tonë tokësore e qiellore. Kjo është mrekulli, është shenjtëri, është histori që s’është parë, as dëgjuar kurrë. Është një fenomen, prej te cilit përfitoi e krenohet mbarë njerëzimi, të varfrit dhe të pasurit, të mëdhenjtë dhe të vegjlit, të lirët dhe të robëruarit, të ngopurit dhe të uriturit, të shëndoshët dhe të sëmurët, të privilegjuarit dhe të përjashtuarit, besimtarët dhe jobesimtarët. Për secilin njeri, në katër anët e Globit është pasqyrë për njerëzi, për mirësi”, tha Krasniqi.
Seanca solemne e Kuvendit të Republikës, është në vazhdën e manifestimeve dhe aktiviteteve që po i zhvillojnë institucionet e Kosovës për nder të njëqindvjetorit të lindjes së humanistes me origjinë shqiptare Gonxhe Bojaxhiu – Nënë Tereza.
Këto manifestime po organizohen nga presidenti i Republikës, Fatmir Sejdiu, i cili vitin 2010 e ka shpallur si vit të Nënës Terezë. Me këto manifestime, sipas kryeparlamentarit Krasniqi, Kosova po i bashkohet pothuajse të gjitha vendeve të botës, të cilat me aktivitete dhe manifestime të ndryshme po shënojnë këtë vit jubilar të lindjes së humanistes shqiptare.
“Kjo Nënë e jashtëzakonshme, e papërsëritshme, mrekullisht dhe bindshëm e mishëroi dhe e dëshmoi para gjithë botës historinë, traditën, kulturën shqiptare dhe atë mbarënjerëzore. Edhe pse gjithnjë e zënë në luftë kundër të ligave, varfërisë mbytëse dhe sëmundjeve të shumta, Nëna Terezë kurrë nuk e harroi Popullin saj, ninullat e prindërve të saj, dashurinë për fëmijët. Nëna jonë, Nëna e gjithë njerëzimit, të cilën e pritnin si hyjneshë nevojtarët e mbarë botës, edhe pse kishte shumë punë, ajo gjente kohë dhe kishte mirësi ta vizitonte Kosovën dhe Shqipërinë”, tha Krasniqi.
Me vendosmërinë si të Nënës Terezë, populli i Kosovës, sipas tij i përballoi vitet më të vështira të fundshekullit që shkoi.
“Populli ynë ndjehet i privilegjuar dhe krenar për bijën e tij humaniste të këtyre përmasave, që ishte gruaja më e madhërishme e botës së shekullit njëzet. Është pra një nder dhe një privilegj i madh për të gjithë ne, që jetuam në epokën e saj e bëmë ndryshime të mëdha, që e patëm dhe e kemi përjetësisht një Gonxhe, të cilën mbarë bota e quan Nëna Terezë.
Nderi dhe lavdia e përcjelltë në përjetësi Nënë Terezën”, tha Krasniqi.
Derisa më 26 gusht, kur ishte ditëlindja e Nënës Terezë, Kuvendi i Maqedonisë mbante seancë solemne për humanisten shqiptare, në Kosovë atë ditë pati vetëm aktivitete periferike dhe jo një seancë në Kuvend.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30