Riza Hoxha, Gjon Neçaj: Zyraja, invalidja e dashuruar me jetën

nga **Agim Gashi** Mon Sep 13, 2010 12:57 am

Zyraja, invalidja e dashuruar me jetën

Nga Riza Hoxha, Gjon Neçaj

Në qytetin e Bajram Currit të gjithë e njohin, jo për fatkeqësinë që ka pësuar në jetë, por për dashurinë që ka për jetën dhe përpjekjen gati mbinjerëzore për t'iu mos nënshtruar fatkeqësisë. Edhe pas 35 viteve nga fatkeqësia, poetja Zyra Ahmetaj njihet nga të gjithë qytetarët, ndërsa Bashkia e ka nderuar me titullin "Krenaria e qytetit".

"Zyraja është krenaria e qytetit, këtë titull ia kanë dhënë qytetarët",- thotë ish-mësuesi i saj ,Sadri Oruçi. Në realitet libri i saj "Fluturojnë engjëjt" prej kohësh është bërë libri më i lexuar nga rinia e qytetit verilindor,thotë përgjegjësi i bibliotekës publike,Avdyl Sulaj.

"Lexohet se përcjell mezazhin e dashurisë për jetën. Nuk janë thjesht vlerat artistike të vargut, por mesazhi që ato përcjellin, aq më tepër që këto mesazhe përcillen nga Zyraja", thotë Lulzim Logu,kryetar i Klubit Letrar.

ZYRAJA E DASHURUAR ME JETËN

Zyraja ishte vetëm 19 vjeç, kur në vitin 1975 u nis për në aksion në Elbasan. Pas një muaji ndërsa po kthehej në vendlindje me bashkëmoshatarët, autobuzi ra në humnerë në Shpal të Mirditës, ku vdiqën 4 të rinj dhe shumë të tjerë u lënduan. Tropojanët ende e kujtojnë aksidentin , ku mes të lënduarve, ishte edhe Zyraja.

"Në këtë aksident humba aftësinë për të ecur. Jam kuruar brenda e jashtë vendit dhe vetëm pas shumë kurimeve arrita të ec me paterica", kujton me dhimbje Zyraja.

"Aksidenti ishte i rëndë. Isha e re dhe mendova se ëndrrat dhe jeta ime mbaroi këtu. Isha vetëm 19 vjece dhe vetëm fakti se nuk do të mund të ecja kurrë , ishte tortura më e madhe për mua", vazhdon ajo.

Populli ka një fjalë të urtë: "kurrë mos u dorëzo". Dhe Zyraja kështu bëri. Gjeti forcën ta përballojë jetën te librat e vargjet e poezisë,te jeta aktive dhe pasionet e saj të pashuara.

"Të jetoja e t'u shërbeja njerëzve të mi, forcën e gjeta te poezia, te shkrimet ,te vjershat që i shkruaja edhe në momentet më të vështira të jetës, pasi poezia është jeta ime", thotë Zyraja.

ZYRAJA MES ËNDRRËS DHE REALITETIT

Zyraja tregon se ka qenë nxënëse shembullore në mësime. Në adoleshencë ka lexuar shumë libra, ishte e shkëlqyer dhe kishte ëndrra, si të gjitha bashkëmoshataret e veta.

Ringritja në paterica i dha Zyrasë, ish-artistes amatore të rrethit dhe ish-sportistes së ekipit të volejbollit, forcën jo vetëm për ta jetuar jetën, por edhe për t'i shërbyer asaj, përmes krijimtarisë letrare e përmes qëndismave me të cilat ndihmon edhe familjen.

Ajo tashmë njihet nga të gjithë si një qendistare e rrobave kombëtare për gra dhe të rritur,fëmijë e vajza.Xhamadanin,xhubletën,tirqit,tashmë i sheh në shitje ngado ,të cilat janë qendisur nga dora e artë e Zyrasë.Pra ajo qendis me duart e saj vargje dhe mrekullitë e veshjeve të trevës.

Por Zyra Ahmetaj ka edhe një pasion tjetër. Ajo përvetësoi aq mirë anglishten sa nisi të japë kurse falas të mësimit të anglishtes, në shtëpinë e saj.

"Kam realizuar ëndrrën time, edhe kështu t'u shërbej bashkëqytetarëve të mij. Kënaqësia më e madhe është kur edhe pse rrallë dal me karrocën e invalidit, të gjithë më përshëndesin", tregon ajo.

SI E KALON JETËN ZYRAJA

Jeta e Zyrasë është e mbushur me aq shumë aktivitet sa është vështirë kush nuk e njeh, të besojë se ajo është invalide prej 35 vitesh. Familja e saj e ardhur nga Kepeneku në fillim të viteve '90 është vendosur në Bajram Curri bashkë me 4 vëllezërit dhe një motër.

Sot vazhdon të shkruajë poezi dhe të japë mësime falas të gjuhës angleze.

"Nuk është vetëm poezia drita e shpëtimit për mua, por edhe kurset e gjuhës angleze që jap për fëmijët e qytetit tim",- thotë thjeshtë Zyraja.Ajo është e lidhur edhe me klube letrare në Gjakovë dhe është anëtare nderi e shumë klubeve letrare brenda dhe jashtë vendit.

Ka krijuar në qytetin e Bajram Currit edhe degën e shoqatës "Shpresë dhe dashuri" me synimin për t'u ardhur në ndihmë praplegjikëve të rrethit. Ajo është shumë aktive si kryetare e shoqatës.Pajisja me karroca invalidi,ndihma dhe dhurata të ndryshme nga fondacione të huaja bamirëse,janë disa nga premtimet që Zyraja ua ka bërë realitet.

"Përmes shoqatës u vijmë në ndihmë sadopak paraplegjikëve të rrethit, edhe pse kemi vështirësi lëvizjeje. Por strukturat shtetërore më ndihmojnë", thotë kryetarja Zyra. Ndaj të gjithë në Bajram Curri e njohin poeten, qëndistaren dhe kryetaren e një shoqate humanitare.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30