Sejdiu: LDK do të marrë qeverisjen e Kosovës

nga **Agim Gashi** Sat Oct 16, 2010 8:07 pm

Sejdiu: LDK do të marrë qeverisjen e Kosovës

Kryetari i Lidhjes Demokratike të Kosovës (LDK), Fatmir Sejdiu, ka shprehur besimin se partia që ai drejton do të fitojë në zgjedhjet e parakohshme parlamentare dhe se do të qeverisë vendin.
Ai këto komente i bëri të shtunën gjatë një takimi me degët e Lidhjes Demokratike të Kosovës për Prishtinë, me ç’rast ka folur për zhvillimet brenda kësaj partie në prag të kuvendit të përgjithshëm të LDK-së.
“Jemi në ditën e zhvillimeve më të mëdha të Kosovës dhe LDK-së, e cila gjithmonë ka pasur për synim pavarësimin e integrimin e Kosovës në strukturat euroatlantike”, ka thënë Sejdiu.
Ai u ka bërë thirrje të rinjve që t’i bashkëngjiten LDK-së, duke thënë se me këtë interesim të madh të gjeneratës së re dhe me vizionin që ka kjo parti, LDK-ja në zgjedhjet e ardhshme do të fitojë dhe do ta bëjë qeverisjen e ardhshme të vendit.
“Jam i gatshëm me miqtë e mi ta udhëheq LDK-në edhe në proceset e ardhshme që do të ndodhin”, ka thënë Sejdiu.
Duke folur rreth mbajtjes së zgjedhjeve të parakohshme parlamentare, të cilat janë caktuar për 13 shkurt, Sejdiu ka thënë se vendimi për datën e zgjedhjeve është marrë pas konsultimeve të u.d. presidentit të vendit Jakup Krasniqi me partitë e tjera politike, dhe pavarësisht asaj se LDK-ja ka kërkuar më herët që zgjedhjet të mbahen në fillim të marsit, kjo parti do të bëjë të gjitha përgatitjet që të hyjë në këto zgjedhje.
Një fjalë rasti para të pranishmëve kanë mbajtur edhe kryetari i komunës së Prishtinës Isa Mustafa dhe anëtari i kryesisë së LDK-së Sabri Hamiti.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30