Kosova në nëntëvjetorin e rënies së heronjve Bekim Kastrati dhe Besim Dajaku

nga **Agim Gashi** Tue Oct 19, 2010 8:35 am

Kosova në nëntëvjetorin e rënies së heronjve Bekim Kastrati dhe Besim Dajaku

Editoriali

Më 19 tetor 2001, plot nëntë vjet më parë, në një pritë të pabesë, binin në altarin e lirisë dhe pavarësisë së Kosovës heronjtë Bekim Kastrati, gazetar i gazetës kombëtare „Bota Sot“ dhe Besim Dajaku, truproja i Presidentit të Shtetit të Kosovës Ibrahim Rugova. Binin dy djem të rinj, dy djem plot ëndrra, dy luftëtarë të shquar të Ushtrisë Çlirimtare të Kosovës, dy shokë armësh në luftë dhe shokë idealesh në jetë. Ata që i merrnin në shënjestër këta bij trima të atdheut dhe të kombit donin t’i përgjaknin zgjedhjet e para parlamentare të mbante Kosova pas çlirimit të saj nga okupatori serb, donin të përgjaknin fjalën e lirë shqipe, së cilës i kushtohej Bekim Kastrati, donin të vrisnin mendimin e lirë kombëtar të Kosovës, donin t’ia mbyllnin gojën gazetës kombëtare „Bota Sot“, luftëtares së pamposhtur për lirinë dhe pavarësinë e Kosovës, luftëtares së paepur për të vërtetën dhe të drejtën e Kosovës, për të drejtën dhe të vërtetën e kombit. Prej atëherë Kosova ka mbajtur të tjera zgjedhje në nivel të përgjithshëm dhe vendor, secila më shembullore se tjetra, secila me standarde më të larta perëndimore se tjetra. Bekim Kastrati dhe Besim Dajaku jetuan dhe ranë pikërisht për një Kosovë të të tillë të hapësirave të lira, për një Kosovë të frymëmarrjes së lirë, për një Kosovë të së ardhmes së sigurtë, të cilën askush të mos ketë të drejtë t’ia cenojë, ranë për Kosovën të cilën e gëzojmë sot ne të gjithë, Kosovën tashmë me pavarësi të zyrtarizuar që nga 17 Shkurti 2008. Ata ranë për një Kosovë krejt të ndryshme nga ajo e kohës së okupacionit, një Kosovë me një përditshmëri krejt tjetër nga ajo e kohës së okupacionit. Bekim Kastrati dhe Besim Dajaku ranë përballë mbeturinave të kohës së okupacionit, përballë atyre që vazhdonin të mbartnin mendësinë e dikurshme të mbjellë nga okupatori. Ata ranë për një mendësi krejt të re, për një frymë e për një frymëmarrje krejt të re të Kosovës, ku të gjithë të jenë luftëtarë të ndërtimit dhe të konsolidimit të shtetit të pavarur dhe sovran të Kosovës, të jenë luftëtarë të ndërtimit të jetës së re të Kosovës, të shoqërisë së lirë dhe vëllazërore të Kosovës. Nëntë vjet pas rënies së Bekim Kastratit ende drejtësia nuk e ka thënë fjalën e saj, ende në bankën e të akuzuarit nuk kanë shkuar vrasësit e tyre dhe të burrave të tjerë të shquar të Kosovës. Nëntë vjet pas rënies së Bekim Kastratit dhe Besim Dajakut, heronjve të lirisë dhe të pavarësisë kombëtare të Kosovës, Kosova më shumë se kurrë e dënon çdo akt që synon t’ia cenojë popullit të Kosovës të sotmen dhe të ardhmen e vet për të cilat ai është martirizuar më shumë se një shekull, për të cilat ka derdhur oqeane të pafundme të gjakut. 19 tetori le të shndërrohet në thirrje të Kosovës për bashkim dhe unitet kundër çdo të lige dhe çdo të keqeje, kundër çdo mbrapshtie. Sepse vetëm në këtë mënyrë mund të ndërtojmë Kosovën tonë për të gjithë ne, Kosovën siç e deshën të gjithë heronjtë dhe dëshmorët e Kosovës, Kosovën siç e deshi Ushtria Çlirimtare e Kosovës e komandantit legjendar Adem Jashari, ku ishin të rreshtuar edhe Bekim Kastrati dhe Besim Dajaku deri në çastin e fundit të jetës, ideal për të cilin luftojnë e punojnë të gjithë ata që e duan Kosovën paqësore demokratike, ku të sundojë ligji, ku të sundojë drejtësia, ku të mbretërojë stabiliteti, paqja, përparimi.

bota sot

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30