Tiranë: Berisha takoi kreun e AKR-së

nga **Agim Gashi** Mon Nov 01, 2010 11:44 pm

Tiranë: Berisha takoi kreun e AKR-së

Në kuadër të vizitës që po zhvillojnë në Shqipëri, kryetari i Aleancës Kosova e Re, Behgjet Pacolli dhe nënkryetarja, Mimoza Kusari-Lila, janë takuar edhe me kryeministrin e Shqipërisë, Sali Berisha si dhe me zëvendëskryeministrin dhe ministrin e Ekonomisë, Ilir Meta.
Në takimin e ngrohtë dhe vëllazëror që është zhvilluar ndërmjet kryeministrit të Shqipërisë, Sali Berisha me udhëheqjen e AKR-së, Behgjet Pacolli dhe Mimoza Kusari-Lila, thuhet të jenë diskutuar një mori çështjesh të rëndësishme për bashkëpunimin midis Kosovës dhe Shqipërisë.
Në këtë rast, kryeministri Berisha foli për angazhimin e tij dhe të kabinetit që ai përfaqëson për të promovuar shtetin e ri të Kosovës, përfshirë këtu edhe lënien në dispozicion të infrastrukturës diplomatike të Republikës së Shqipërisë në favor të interesave të Republikës së Kosovës, me ç`rast e çmoi lart punën lobuese të Behgjet Pacollit si dhe përpjekjen e tij për rritjen e numrit të njohjeve për Kosovën.

Gjatë takimeve po ashtu janë diskutuar edhe mundësitë e ngritjes së bashkëpunimit ekonomik ndërmjet dy vendeve, me ç`rast nga kryeministri Berisha është kërkuar që të krijohen kushte të barabarta për plasimin e produkteve të Kosovës në tregun e Shqipërisë.
Në këtë kontekst, u përmend edhe rasti i mosplasimit të patates, si dhe rasti i mosplasimit të rrushit të Rahovecit në tregun shqiptar.
Kryeministri Berisha ka shprehur brengosjen e tij gjatë dëgjimit për pengesat e plasimit të rrushit në tregun e Shqipërisë dhe premtoi se do t`a shqyrtojë për së afërmi mundësinë e heqjes së të gjitha barrierave në mes të tregut të Kosovës dhe Shqipërisë.
Në interesimin e përfaqësuesve të AKR-së, për integrimin e mëtejshëm të zonës kufitare të Malësisë së Gjakovës, kryeministri shqiptar e informoi se në vitin 2011 do të fillojë ndërtimi i rrugës së Fierzës, rrugë kjo e cila do ta afrojë më shumë këtë zonë.
Kryeministri shqiptar, gjithashtu i informoi se projekti i hekurudhës Kosovë - Shqipëri është një projekt për të cilin do të bëhet studimi i fizibilitetit, i cili padyshim që do të realizohet në një të ardhme të afërt.
Në anën tjetër, kryetari i AKR-së, Behgjet Pacolli e informoi kryeministrin Berisha me dinamikën e proceseve politike në Kosovë duke e siguruar se zgjidhja e situatës aktuale në Kosovë po bëhet në kuadër të Kushtetutës së Republikës së Kosovës

Ndërsa gjatë bisedës me Ilir Meten thuhet të jenë diskutuar çështje mbi krizën institucionale në Kosovë dhe rrugën e zgjidhjes së saj, si dhe rolin e AKR-së në këtë proces.
Zëvendëskryeministri shqiptar, Ilir Meta vlerësoi rolin e Pacollit në drejtim të njohjeve të reja të Kosovës, ndërsa Pacolli e vlerësoi mbështetjen e Metes në cilësinë e ministrit të Jashtëm në këtë proces.
Gjatë ditës së hënë kreu i AKR-së, Behgjet Pacolli mori pjesë edhe në ceremoninë e dekorimit nga Presidenti i Republikës së Shqipërisë, Bamir Topi, të ministrit të Jashtëm të Republikës së Maldiveve, Ahmed Shaheed, një njeri me kontribut të jashtëzakonshëm në procesin e njohjeve të Kosovës.
Ndërkaq, gjatë qëndrimit të tij në Shqipëri, Pacolli pasdite ka qenë në Lezhë, ku edhe ka marrë titullin “Qytetar Nderi” i kësaj komune, titull ky që i është dhënë me miratimin unanim të të gjithë këshilltarëve të partive të ndryshme të Shqipërisë.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30