Adem Zaplluzha:I KËNDON GURIT DHE MALIT(Mikut tim Agim Gashit)

nga **Agim Gashi** Fri Dec 17, 2010 12:00 am

Adem Zaplluzha:I KËNDON GURIT DHE MALIT

(Mikut tim Rapsodit Agim Gashi)

Mos këndo
Kur vetëm zemra të këndon
Pyete telin e katërt të sharkisë
Dhe ndalu në perden e dytë
Bisedo me eposin
Miku im

Ti nuk heshte
Kur na i vodhën këngët
Edhe më shumë bisedove
Besa edhe i përballe stuhitë
Kur shkoje me Anton Çettën
Deri të Verrat e Llukës

Të thanë ja kalorësi i rapsodive
Që zbret nga lashtësia
Ti heshte
Në zërin tënd burrëror
Nuk i përfille vajet
Por këndove
Për gjakun që i falej atdheut

Të kujtohet ajo lokja
Që i lidhte thinjat e flokëve
Në këmishën e përgjakur
Dhe e shtrydhte kokën e gjarprit
Mu si zanat e malit
Kur i ndihmonin Mujit

Asnjë pikë loti
Në vetullat e shkëmbit
Çdo gjak i falej atdheut
I falej djemurisë
Që një ditë të zgjohet
Më krenar se dykrenori
Më krenar se liria

II

Ende me sharkinë e vjetër
Je duke bredhur
Ti miku im
Herë në metropolet e Evropës
E herë në Tiranë e Prishtinë

I këndon gurit dhe malit
Edhe dheut
që i ndihet gjëma
Përroit që në kujtesë
Na gurgullon
Sa me afsh i falesh atdheut
Nga DÜRENI e largët
Kur një sharki gjëmon
E një zë i ëmbël
Përmallshëm na jehon

Adem Zaplluzha:I KËNDON GURIT DHE MALIT(Mikut tim Agim Gashit) Pb260191

Adem Zaplluzha:I KËNDON GURIT DHE MALIT(Mikut tim Agim Gashit) Pb260191

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30