Protestat e opozitës, mbyllen pa incidente

nga **Agim Gashi** Fri Feb 04, 2011 8:30 pm

Protestat e opozitës, mbyllen pa incidente

Gjatë demonstratës së sotme në Vlorë

Ndryshe nga dhuna e ushtruar gjatë demonstratës së 21 Janarit, sot pamë një opozitë më të tërhequr

(I plotësuar) Të qeta dhe pa incidente kanë qenë sot katër protestat e paralajmëruara të opozitës në Tiranë, Vlorë, Korçë dhe Lezhë.
Ato ofruan sot pamje të ndryshme nga dhuna e ushtruar ndaj forcave të policisë dhe institucioneve mesditën e 21 Janarit, e cila pasoi me 3 viktima dhe dhjetëra të plagosur.
Në qytetin e Tiranës, selia rozë kishte caktuar deputetët Namik Dokle, Vasilika Hysi, Saimir Tahiri, Eduard Shalsi dhe Fatmir Xhafaj, për të udhëhequr turmat e protestuesve.
Ndërsa në demonstratën e Vlorës, si drejtues i saj ishte caktuar kreu i grupit parlamentar socialist, Gramoz Ruçi; në atë të Korçës, deputetët Ben Blushi dhe Pandeli Majko; kurse në Lezhë turmat do të drejtoheshin nga deputetët Tom Doshi dhe Gjovalin Kadeli.
Siç e pamë ecurinë e protestës, në Tiranë protestuesit u bashkuan tek Zogu i Zi, duke u nisur nga pika të ndryshme, ndërsa forcat e Policisë Rrugore u përpoqën që të mos krijohej asnjë problem me qarkullimin e automjeteve dhe kalimtarët.
Protesta në Tiranë nisi gati një orë me vonesë nga orari që ishte parashikuar, 14.00 dhe zgjati rreth 30 minuta.
- - - - - -
Ka përfunduar demonstrata-marshim në qytetin e Vlorës.
Të pranishëm në këtë protestë kundër qeverisë kanë qenë deputetët e qarkut nën drejtimin e Gramoz Ruçit
Pika e mbylljes së këtij marshimi mësohet të jetë “Sheshi i Flamurit”, dhe deri më tani nuk ka pasur asnjë incident.
Ndërsa në qytetin e Korçës, demonstruesit janë shpërndarë drejt vendbanimeve të tyre, duke u nisur me autobuza drejt Pogradecit dhe zonave përreth.
Të pranishëm në këtë protestë kanë qenë deputetët socialist të dalë nga ky qark, nën drejtimin e Pandeli Majkos.
Edhe në qytetin e Lezhës pak minuta më parë u mbyll protesta e zhvilluar paqësisht, pasi protestuesit së bashku me drejtuesit e protestës së organizuar, janë shpërndarë.
Por deputeti i këtij qarku Gjok Jaku ka thënë para protestuesve që qytetarët të vazhdojnë të mblidhen në protesta për të rrëzuar qeverinë.
Demonstrata, fillojnë grumbullimet e para
Kanë nisur grumbullimet e para të demonstruesve në disa zona në kryeqytet, nga ku do të nisë edhe marshimi për në sheshin përpara muzeut kombëtar.
Protestuesit do të fillojnë marshimin nga zona të ndryshme të kryeqytetit për t’u mbledhur më pas në hyrje të rrugës së Durrësit nga ku do të marshojnë përgjatë kësaj rrugë.
Përveçse në kryeqytet, sot opozita e bashkuar po zhvillon tubime edhe në Vlorë, Korçë dhe Lezhë.
PS zhvilllon sot protesta në katër qytete
Partia Socialiste pritet të zhvillojë sot protestat e saj në katër qytete njëkohësisht dhe përkatësisht në Tiranë, Lezhë, Korçë dhe Vlorë.
Mësohet në protestën që do të zhvillohet në kryeqytet do të grumbullohen qytetarët e Tiranës e të Durrësit, në Vlorë do të grumbullohen ata të Vlorës, Beratit e Fierit, në Lezhë do të protestojnë qytetet e Veriut, ndërsa në Korçë do të mblidhen qytetarë të Elbasanit, Korçës e Pogradecit.
Gjithashtu mësohet se në protestat e sotme në 4 qytetet e vendit, ndryshe nga protesta e një jave më parë do të ketë pankarta të ndryshme, ku do të denoncohet dhuna e ushtruar në 21 janar, keqqeverisja e kryeministrit Berisha dhe kërkesa për zgjedhjet të parakohshme.
Ky plan demonstratash pritet që të përdoret nga Partia Socialiste vetëm për këtë javë, ndërkohë që gjithçka për strategjinë në vijim të opozitës pritet që të diskutohet pas 4 shkurtit.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30