Mustafa: Pavarësia u përket atyre që e ndërtuan

nga **Agim Gashi** Thu Feb 17, 2011 9:45 pm

Mustafa: Pavarësia u përket atyre që e ndërtuan

Komuna e Prishtinës, me rastin e trevjetorit të pavarësisë së Kosovës, sot, mbajti mbledhje solemne.
"Sigurisht, puna më e lehtë është që ta shënojmë këtë ditë, ta kremtojmë me aktivitete dhe solemnitete të llojllojshme. Por e vështirë, e mundimshme dhe e dhimbshme ishte rruga që kaluam të gjithë ne, ishte sakrifica dhe përkushtimi shekullor për liri, ishte heroizmi që treguan njerëzit e këtij vendi", tha kryetari i Komunës së Prishtinës, Isa Mustafa në fillim të fjalës së tij me rastin e trevjetorit të pavarësisë së Kosovës, në të cilën akademi morën pjesë përveç këshilltarëve komunal edhe të ftuar tjerë.
"Sot shprehim nderin dhe respektin tonë të madh për gjithë luftëtarët e UÇK-së, për presidentin Rugova dhe të gjithë ata që simbolizojnë këtë ditë të madhe.
Dita e pavarësisë, është një rast i mirë që të përkujtojmë dhe falënderojmë miqtë tanë, të cilët në ditët më të vështira na u gjetën afër, të cilët na përkrahën në momentet më të rënda dhe historike për Kosovën dhe të cilët edhe sot po e ndihmojnë ngritjen në këmbë të shtetit tonë të pavarur, Shtetet e Bashkuara të Amerikës, Britaninë e Madhe dhe vendet e tjera të demokracisë evropiane dhe NATO-n.
Ky përvjetor na rikthen kujtesën se si jetuam dje, si po jetojmë sot dhe na ndërgjegjëson sesi duhet ta ndërtojmë të ardhmen tonë. Na i rikujton ideatorët e pavarësisë, heronjtë e kombit, dëshmorët dhe martirët e lirisë. Porse, na i rikujton edhe vuajtjet e pakufishme të gjeneratave të shumta, qëllimi i të cilave ishte liria, demokracia dhe pavarësia.
Sot, me të drejtë shtrohet pyetja sesa po i përmbushim obligimet tona njerëzore e kombëtare që të ardhmen tonë dhe të brezave që vijnë pas nesh ta bëjmë më të mirë dhe të qëndrueshme. Cila është përgjegjësia dhe koherenca jonë për çështjet madhore të këtij vendi, për drejtimin e mirë të tij, për hapjen e dyerve në familjen evropiane. Sa po bëjmë të gjithë ne në Prishtinë dhe në Kosovë që njerëzve t'ua bëjmë jetën më të mirë dhe më të lehtë", tha Mustafa

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30