Adem Zaplluzha:MERRE KËTË LULE

nga **Agim Gashi** Thu Mar 03, 2011 10:08 pm

Adem Zaplluzha:MERRE KËTË LULE

Merre këtë lule
Është ende e freskët
E këputa nga kujtesa
Aty janë palosur
Të gjitha dhembjet
Dhe gëzimet e fëmijërisë
Merre lulen të lutem
Trishtimi i dhembjes
Është në aromën e saj
Kur gjethet e dimrit
Lëshojnë kujën
E nënës flokëbardhë
Merre lulen të lutem
Nuk di për të satën herë
Jam duke të lutur
Në daç ti
Mbille në kujtesën tënde
Si kujën
Mos u hamend
Ujite me lot
Ose me qeshjen e azelesë

2
Por të lutem
Merre lulen e këputur
Nga rrënja e trurit
Puthja aromën e saj
Ose lëre në qenien e gurit
Kur stralli qesh
Tok me dhembjen krenare
Përsëri po të lutem
Mos e lërë drurin
Në këtë shkëmb
Merre përqafoje
Ose mbille në syrin
E malit
Që t’i këndojnë zanat ninullë
E të lindë
Aroma e dashurisë
Pranverat vdesin
Nëse nuk ujiten me lot
Ti merre stinën
Dhe lulen
Asgjë më s’ka mbetur
Në kujtesën time të brishtë
Pos dhembjes së pashëruar

3
Asnjë pikë uji
Mes reve të zeza
Kalorësit e rrufeve
Kanë mbetur pa kamxhik
Merre këtë heshtje të lutem
Këpute kërcellin e saj
Për memorien e kavallit
Delet moti kanë ikur
Nga kullotat tona
Atje lartë
Mes reve të bardha
Kurrë më
S’do të ketë shi
Kjo po më brengos
Se si do të ujiten dhembjet
Pa lotin tim
Merre të lutem
Këpute këtë lule
Nga kujtesa hijerëndë
Mos të mbetet asnjë bejleg
Për kalorësit e agimeve
Dhe ik në paqe
Me engjëjt e qiellit
Shko deri atje
Ku s’ndalen të reshurat

4
Këngën e pate mike
Kur këndoje për lulet
Andaj
Merre këtë ofshamë
Mikja ime
Merre aromën e dhembjes
Shko ku të duash
Ose lëre
Mbi gurë të varrit
Që t’ i ledhatojë sytë
Me lotët e rrënjës
Adem Zaplluzha
Nga libri Hijet e ndryshkura

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30