Adem Zaplluzha:SHKUNDE TË GJITHA KUJTIMET

nga **Agim Gashi** Sun Mar 06, 2011 12:52 am

Adem Zaplluzha:SHKUNDE TË GJITHA KUJTIMET

Të lutem
Lëri kujtimet atje ku janë
Mos e ngacmo
Gojfilin mes reve

Të përgjëroj
Me derdhjen e lumit
Mos e prek gurin e sinorëve
Në memorien time
Jam tejet i lodhur
Nuk mundem më
T’i duroj rrahjet e zemrës
As kërcëllimën e gishtave

Kah u tretën ditët
Pas cilës stinë
Iku magjia e yllit
As hyji më nuk e kupton
Dhembjen time

2.
Shiko se si është shembur
Urtia e gurit
Në këtë pjesë kërthizore
Lisat e gjatë kanë rënë
Tatëpjetë greminës

Në lotin e brishtë
Janë tretur barojat
Unë më kurrë
Nuk do të kem dëshirë
Që ta rikthej lumin
Në shtratin e vjetër

S’dua
S’kam t’ua prishi qejfin
As gjumin e algave
Në qepalle e natës

3.
Sot ndoshta do të darkojë
Në lotin e hënës
Tok me të kaluarën time
Ose do t’i ftojë hijet
Në dasmën e hamshorëve

Ti duhet të më lësh të qetë
Mos mi përkujto
Letrat e grisura
As dashurin e huajtur
Prej ëndrrës së dënesje

Moti kam mbetur jetim
Në vuajtjen time
Vetminë e pata mike
Dhe këngën
Që të ma përkujtojë
Lotin e zambakut
Në stërkalat e Lumëbardhit

4.
Ti mund të ecësh
Ballëhapur në takim
Pa e turbulluar memorien
Asgjë s’ ke për të humbur
Në këtë lojë
Nëse takohesh
Me qeshjen tënde
90
5.
Asnjë lule
Nuk kemi këputur
Në Kopshtin e Edenit
Edhe mollët janë shkundur
Nga degët e kafshuara
Erërat përtypnin
Trungjet e kalbura
As bari nuk rritej
Në atë korije
Para nesh kishin arritur delet
Dhe vetëm zhuri i kujtimit
Shtrihej nën këmbë

6.
Më duket se i harruam lotët
Në degët e thata të shelgjeve
As nuk luanim lojën e fyellit
Ishim të dërmuar nga malli
Kur e kuptuam rikthimin e lumit
Në anën e kundërt të derdhjes
Bënte një mot i lig atë ditë
Kur nga qerpiku i yt
I shkunde të gjitha
Çmalljet e kujtimit
Duke ftuar të kaluarën
Në sofrën tonë
Që të darkojmë së bashku
Lotin e trishtimit
Adem Zaplluzha

Nga libri Hijet e Ndryshkura

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30