Spanjollët i ndryshon Washingtoni

Spanjollët i ndryshon Washingtoni





Spanja bëhet fleksibile rreth kornizës kohore të tërheqjes nga Kosova. Ushtarët spanjollë mund të mbesin në KFOR edhe 18 muaj. Ndryshimi erdhi pas takimeve të zyrtarëve spanjollë në Washington.

Nga Express më 22.03.2009 në ora 19:14

Spanja ka ndryshuar qëndrimin e saj për kohën e tërheqjes së trupave të saj nga KFOR’i.

Gjatë qëndrimit të stuhishëm në Kosovë të enjten e kaluar, Ministrja Carmen Chacon, e kishte shpallur praninë ushtarake spanjolle në vend si mision të përmbushur dhe kishte paralajmëruar ushtarët se do të kthehen në shtëpi deri në fund të qershorit.

Qeveria spanjolle ka paralajmëruar të dielën se do të jetë fleksibile në kornizën kohore të tërheqjes së 632 ushtarëve të saj.

“Ministrja e Mbrojtjes Carmen Chacon do të takojë Sekretarin e Përgjithshëm të NATO’s javën e ardhshme për të sqaruar arsyet e tërheqjes dhe për të arritur një vendim të përbashkët për kornizën kohore”, ka thënë një zëdhënës i Kryeministrit të Spanjës.

“Vendimi për t’u larguar është marrë, por ne mund të jemi fleksibilë sa i përket kornizës kohore, të jetë një vit, 18 muaj ose tetë muaj…”.

Komenti i zëdhënësit është një lëvizje nga deklarata e Kryeministrit Jose Luis Rodriguez Zapatero të premten se trupat do të largohen nga Kosova Brenda katër-pesë muajve të ardhshëm.

Zapatero kishte thënë se po nxirrte trupat spanjolle jashtë për shkak se situate e sigurisë në Kosovë ishte përmirësuar dhe se nuk kishte kuptim që ato të mbeteshin atje pasi spanja nuk e njeh pavarësinë e Kosovës.

Paralajmërimi u kritikua nga Sekretari i Përgjithshëm i NATO’s, Jaap de Hoop Scheffer, për shkak se nuk kishte marrë pajtimin paraprak të aleancës.

Edhe Shtetet e Bashkuara të Amerikës kishin reaguar të premten duke thënë se janë “thellësisht të dëshpëruara dhe të befasuara”.

Por, Qeveria e Spanjës ka thënë të shtunën se kishte sqaruar keqkuptimin me Washingtonin në lidhje me tërheqjen e trupave spanjolle nga Kosova.

“Me t’u sqaruar se tërheqja do të bëhej në një koordinim të plotë, reagimi i SHBA’së dhe aleatëve tanë ka qenë plotësisht mirëkuptues” ka thënë, Bernardino Leon, top këshilltar i Kryeministrit Jose Luis Rodriguez Zapatero.

“Një faqe është kthyer…kjo stuhi e vogël ka kaluar”, i ka thënë ai radios Cadena Ser.
Leon ka folur pas një takimi “shumë pozitiv dhe frytdhënës” në Washington, të premten vonë, me Këshilltarin Amerikan të Sigurisë Kombëtare gjeneralin James Jones.
Vendimi i Spanjës kishte vënë në pikëpyetje zotimin e kahershëm të NATO’s se aleatët kishin hyrë bashkë dhe do të dilnin bashkë nga Kosova.

Spanja është një prej pesë shteteve të BE’së që vazhdojnë të mos njohin Kosovën e pavarur. Vendimi i saj edhe për tërheqjen e trupave ishte pritur më shumë befasi në qendrat diplomatike perëndimore.