Kryeministri i Kosovës u çon “selam” liderëve të Serbisë

Nuk shkelni më në Kosovë!

Ramiz Bojaj, BOTA SOT
Kryeministri i Kosovës u çon “selam” liderëve të Serbisë





Organet shtetërore të Kosovës, u “prenë” rrugën liderëve të Serbisë, Dragan Gjilasit dhe Mlagjan Gjorgjeviqit, të cilët pa pyetur autoritetet e Kosovës kishin paralajmëruar të vizitojnë Kamenicën.

Nuk mund të shkelin më në Kosovë zyrtarët serbë pa pranuar që atje të shkojnë edhe zyrtarët e Kosovës, si drejtues shteti apo institucionesh të Kosovës, është mesazhi që u ka dhënë të hënën sërish Qeveria e Kosovës zyrtarëve të shtetit të Serbisë. Kryeministri Hashim Thaçi, tha se Kosova është shtet dhe i ka rregullat e veta ligjore dhe kushtetuese. Thaçi tha se nëse autoritetet serbe nuk marrin leje nga autoritetet shqiptare në Kosovë, do të kthehen nga kanë ardhur. “Këshilla ime më e mirë është që as ne nuk po shkojmë, as ata të mos vijnë. Kosova është shtet dhe do të kthehen edhe të tjerët”, tha të hënën kryeministri Thaçi.
Kryebashkiaku i Beogradit, Dragan Gjilas, dhe këshilltari i presidentit të Serbisë, Mlagjan Gjorgjeviq, janë ndaluar që të hyjnë në territorin e Kosovës, në mëngjesin e së hënës, pasi kishin paralajmëruar se do të vizitonin Dardanën.
Zyrtarët e Policisë së Kosovës kanë kthyer mbrapsht dy automjete të këtij delegacioni në vendkalimin kufitar midis Kosovës dhe Serbisë, tek “Dheu i bardhë”. Zëdhënësi i Policisë së Kosovës, Arbër Beka, tha se delegacionit serb i është dhënë fletë-refuzimi për shkak se nuk i ka respektuar procedurat shtetërore për vizita zyrtare në Kosovë. “Të gjithë ata që dëshirojnë të vizitojnë Kosovës, duhet t’i respektojnë ligjet dhe autoritetin e këtushëm”, tha Beka