PUÇRRAT E VAPËS (VAPORET)

Çfarë janë?
• Puçrrat e vapës janë një shpërthim puçrrash të vogla (prush) në lëkurë të shkaktuara nga mbinxehja e tepërt e fëmijës. Kjo është e shpeshtë veçanërisht tek foshnjet e vitit të parë të jetës.
• Në përgjithësi shfaqet në lëkurën e fytyrës dhe në pjesët ku lëkura formon palosje, (kofshë, krahë).

Nuk është e rëndë dhe mund ta mjekoni në shtëpi.
Shenjat
• Prush në ngjyrë rozë në fytyrë dhe në palat e lëkurës.
Çfarë mund të bëni?
• Zbulojeni fëmijën nga mbulesat e rënda e të trasha që e keni mbuluar në shtrat, apo hiqini një shtresë të veshjeve. Lëreni të flejë vetëm me një kanatiere dhe mbathjet me panolina.
• Bëni banjo në ujë të vakët. Mos e fshini, por shtypeni lehtësisht me peshqir lëkurën duke e lënë pak të njomë, në mënyrë që fëmija duke u tharë të freskohet. Kur të thahet lëkura, mund të vini një krem hidratues për fëmijë.
• Masni temperaturen e fëmijës dhe trajtojeni atë sipas këshillave që keni marrë për temperaturën.
Çfarë mund të bëni për të parandaluar puçrrat e vapës
• Në stinën e nxehtë visheni fëmijën lehtë, me veshje pambuku në vend të leshit apo najlonit. Mbajeni në hije, jo në rrezet direkte të diellit.
• Këshillohuni me mjekun nëse prushi nuk zhduket brenda 12 orëve.
Çfarë mund të bëjë pediatri?
Pediatri kontrollon nëse puçrrat janë nga vapa. Në këtë rast nuk ka nevojë për asnjë mjekim. Në rast se dyshon për ndonjë problem tjetër, mjeku do t’ju kërkojë analiza dhe do t`ju këshillojë trajtimin e nevojshëm.


EKZEMA FOSHNJORE
Infektimi i lëkurës mund të shkaktohet nga trashëgimia, si edhe nga alergjia apo sëmundjet ngjitëse. Tipi i ekzemës që prek fëmijët është ekzema atopike që shfaqet në moshën 2-18 muaj.Ekzema seborroike mund po ashtu të prekë fëmijët dhe del ne lëkurën e kokës, qepalla, rreth hundës, veshëve, kanalit të veshëve etj. Në këto vende ka shumë gjëndra seborroike.
Shenjat
Lëkura e prekur nga ekzema atopike është e thatë, e kuqe, me puçrra të vogla të bardha, që plasin kur kruhen. Ekzema seborroike është e ngjashme, por nuk ka kaq shumë kruarje dhe shfaqet në vende të ndryshme. Kruarja është shenja më e rëndë e ekzemës, që shkakton shumë gërvishtje dhe pagjumësi.
Trajtimi
Nëse dyshoni për ekzemë, mjeku do t’ju japë një krem kundër infeksionit dhe qetësues për kruarjen dhe kundër alergjisë. Nëse lëkura infektohet, janë të nevojshëm antibiotikët. Lajeni sa më pak fëmijën, mos përdorni sapun dhe sigurohuni që rrobat të jenë të shplara shumë mirë.


DERMATITET
Janë infeksione të lëkurës që shfaqen si reagim ndaj stresit, alergjisë apo me raste edhe dritës. Dermatiti seborroik prek fytyrën, hundën, qepallat dhe skalpin.

Shenjat
Dermatitet janë zona të irrituara të lëkurës, me ngjyrë të kuqe, ndonjëherë me puçra të bardha mbushur
me ujë. Dermatiti nga drita shfaqet në formën e puçrrave në lëkurën që është nxjerrë në diell.
Trajtimi
Kontaktoni mjekun. Mundohuni që zona e infektuar në lëkurën e fëmijës të mbahet e pastër, që fëmija të mos e kruajë, dhe të mos përdorë sapun.
IRRITIMI I LËKURËS NGA NXEHTËSIA

Një mjedis i nxehtë, i pa ajrosur mund të shkaktojë irritimin e lëkurës. Kjo vjen ngaqë trupi djersit shumë dhe gjëndrat e djersës rriten dhe skuqen. Irritimi i lëkurës nga nxehtësia është i zakonshëm te fëmijët, ngaqë gjëndrat e tyre të djersës nuk funksionojnë ende ashtu siç duhet.
Shenjat
Puçrra të vogla të kuqe shfaqen në pjesët ku trupi është më i nxehtë, veçanërisht në qafë, fytyrë, bërryla
dhe poshtë gjunjëve.
Trajtimi
Mos e vishni fëmijën shumë trashë, lajeni me ujë të ngrohtë dhe thajeni mirë. Sigurohuni që temperatura e dhomës të mos jetë shumë e lartë dhe ajri të qarkullojë. Flisni me mjekun, nëse puçrrat
nuk janë zhdukur pas 12 orësh. Një alergji është një reagim jo normal i sistemit imunitar kundrejt një
kimikati apo substance specifike. Më e zakonshmja është alergjia nga poleni, por fëmijët mund të jenë alergjikë kundrejt shumë gjërave, si për shembull, ushqime, bimë, ilaçe, dritë etj.