OJQ-të kërkojnë largimin e kryetarëve Zharku e Xhemajli

nga **Agim Gashi** Sat Apr 23, 2011 11:43 pm

OJQ-të kërkojnë largimin e kryetarëve Zharku e Xhemajli

Një grup i organizatave joqeveritare (OJQ) nëpërmjet një deklarate kanë dhënë mbështetje të plotë punës së Gjyqësorit në trajtimin e rasteve të ndjeshme që përfshinë zyrtar të lartë shtetëror, si rastet e Xhabir Zharkut, kryetar i Komunës së Kaçanikut dhe Bajrush Xhemajlit, kryetar i Komunës së Ferizajt, që të dy të shpallur fajtor për vepra penale nga Gjykatat e Republikës së Kosovës.

Sipas këtyre organizatave, përderisa gjyqësori ka bërë punën e vetë në këto dy raste, Zharku dhe Xhemajli nuk kanë dhënë shenja se do të respektojnë vendimin e Gjykatës.

“Organizatat tona i konsiderojnë të papranueshme përpjekjet për të injoruar apo shpërfillur vendimin e Gjykatës nga ana e zyrtarëve të lartë të Republikës së Kosovës.

“Sjelljet e tilla i konsiderojmë si shantazh ndaj organeve te drejtësisë dhe minim të përpjekjeve për vendosje të rendit dhe ligjit në Kosovë. Vendosja e interesit individual mbi ligjet dhe vendimet e Gjyqësorit duhet të jetë fenomen i papranueshëm për një shoqëri demokratike.

“Ne, i bëjmë thirrje Qeverisë së Republikës së Kosovës, në mbështetje të nenit 64.1 dhe 64.3 të Ligjit për Vetëqeverisje Lokale, që menjëherë të suspendojë dhe më pas shkarkojë Kryetarin e Komunës së Kaçanikut z. Xhabir Zharku si dhe atë të Ferizajt z. Bajrush Xhemajli nëse këta të fundit refuzojnë të japin dorëheqje”, thuhet në deklaratë.

Organizatat që kërkojnë largimin e dy kryetarëve, Zharku e Xhemajli janë: Qendra për Politika dhe Avokim (QPA), Klubi për Politikë të Jashtme, Iniciativa për Progres (INPO), Syri i Vizionit (SiV), Instituti i Prishtinës për Studime Politike (PIPS), Nisma e të Rinjve për të Drejtat e Njeriut (YIHR), Lëvizja FOL, Qendra e Kosovës për Bashkëpunim Ndërkombëtar (KCIC).

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30