Albright: Shumë mësime janë nxjerrë nga fushata në Kosovë

Albright: Shumë mësime janë nxjerrë nga fushata në Kosovë





E çuam NATO-n në një luftë të gjatë 78 ditëshe. Ishte shumë thelbësore, sepse bëhej në emër të lirisë për njerëzit që përndiqeshin nga shtëpitë e tyre apo që vriteshin. Me këtë u dëshmua edhe vlefshmëria e misionit të ri për NATO-n, ka thënë ish-sekretarja amerikane e shtetit, Madeleine Albright.
Ajo këtë e deklaroi në një intervistë për radion “Evropa e lirë”, në dhjetëvjetorin e ndërhyrjes së NATO-s ndaj caqeve serbe në Kosovë dhe Serbi.
“Ishte edhe çështja e Kosovës dhe pyetja në këtë rast ishte si të ndalej spastrimi etnik. Atëbotë, isha sekretare e shtetit dhe kisha qenë dëshmitare se na është dashur shumë gjatë për të hyrë në Bosnjë”, ka kujtuar Albright dhe shtoi se nuk ishte e lehtë në kuptimin e marrjes së vendimeve, të punës së komitetit ushtarak, të përzgjedhjes së caqeve, por për NATO-n ishin çaste suksesi në përmbushjen e misionit të tij.
“Shpresoj se shumë mësime janë nxjerrë nga fushata në Kosovë, që mund të jenë të dobishme në rajonet tjera, siç është Afganistani. Është pjesë e rrëfimit të njëjtë të periudhës së pas Luftës së Ftohtë”.
Ajo vlerësoi se megjithatë, një aleancë që është themeluar për të qenë anti-sovjetike, ishte në fakt relevante në fund të shekullit të 20-të dhe fillim të shekullit 21 për t’u marrë me problemet e asaj kohe, që kishin të bënin me luftime ndëretnike dhe vrasje e spastrime etnike të njerëzve që jetonin në një vend.
“Ishte evidente nga puna që kishim bërë se rusët do të shfrytëzonin veton për një rezolutë, me të cilën do të kërkohej shfrytëzimi i forcës në Kosovë”, tha Albright.
Ai theksoi se duhej jo vetëm që ta çonin NATO-n në një luftë, por ta bëhej në atë mënyrën që disa vende mendonin se nuk duhej të bëhej.
"Për ne ishte shumë e rëndësishme se ishte një veprim i NATO-s, sepse e bënte një veprim multilateral, me mbështetjen e 16 vendeve anëtare atëbotë, për të ndërmarrë në fakt një operacion ku do të shfrytëzohej forca”.
Sipas saj ky veprim jo vetëm që bëri punën e saj në kuptimin ushtarak, por e legjitimoi edhe fushatën në Kosovë, por asgjë prej kësaj nuk ishte lehtë.