Koment i gazetes "Shekulli"-"Te vota ndahemi, vëlla!"

nga **Agim Gashi** Tue May 17, 2011 7:45 pm

Koment i gazetes "Shekulli""-"Te vota ndahemi, vëlla!"

Kjo gazetë ka shkruar e raportuar më shumë se çdo media në Shqipëri për çështjen kosovare. Kemi mbrojtur e do mbrojmë gjithmonë idenë se Kosova duhet të jetë plotësisht e pavarur dhe se duhet të përparojë sa më shpejt në rrugën drejt BE-së.
Por këto ditë ka ndodhur diçka.

Forumi i gazetës është mbushur me komente që vijnë nga lexues, që prezantohen si kosovarë, të mbushur me fyerje, sharje e kërcënime nga më të rëndat. Ndryshe nga "The Economist", që bëri një alarm të vërtetë kur një kosovar postoi një koment me kërcënime në blogun e saj, ne nuk na bëjnë përshtypje këto fyerje e kërcënime. Por diçka na bën përshtypje: fakti që sa shumë të përkushtuar duken disa kosovarë në mediat e tyre, por edhe në ato të Shqipërisë, për të komentuar për zgjedhjet e fundit në Shqipëri.

E mirëkuptojmë pasionin e tyre për atë që ndodh në vendin tonë, jemi dakord që të kenë idetë e pozicionimet e tyre për çka ndodh këtu. Ne shpresojmë e besojmë se ky numër personash agresivë të jetë fare i vogël, por meqë ajo që shpresojmë të jetë shumicë, po hesht, po themi disa gjëra.

Duhet t'i themi pasi këta persona kanë qenë pjesë e votës. Në ditën e votimit Tirana pati vizitorë zgjedhorë nga Kosova, të cilët vendosën një kryq në një garë që u nda me shumë pak vota. E nisur nga fakti se ditën e shtunë, kur festimet në PD shpërthyen si më urdhër, nuk mund të mos të të binte në sy fakti që kishte shumë makina kosovarësh që bërtisnin për Bashën e Berishën. Askujt nuk ia rrok mendja që të ketë ndonjë shqiptar që shkon e feston në Kosovë. Madje, madje të pakët janë ata që dinë se kush e drejton kryeqytetin e tyre, në mos edhe qeverinë e tyre.

Kosovarët vijnë nga një periudhë e gjatë pushtimi dhe gjithmonë kanë pasur mbështetjen, dashamirësinë e preokupimin shqiptar. Por, nëse ata kanë qenë të pushtuar nga një i huaj, edhe ne kemi qenë të pushtuar nga një vendas deri në fillim të viteve '90. Mijëra njerëz u vranë në atë regjim e varfëria e frika kishte kapluar shpirtin tonë, aq sa në fillimet e demokracisë edhe Kosova na dukej Perëndim për nga zhvillimi.
Ndaj i kuptojmë ata kosovarë që tmerrohen, protestojnë e janë gati të sakrifikohen sapo shohin hijen e pushtuesit të huaj.

Edhe ne jemi po kaq të tmerruar, të gatshëm për protestë e sakrifikim kur shohim hijen e pushtuesit tonë vendas. Nëse kosovarët mendojnë se ajo hije u vjen me negociata, ne kjo hije na vjen përmes votës. Ndaj, jemi të lumtur që ju kemi në mesin tonë, që festojmë e pushojmë bashkë, dëfrehemi e shëtisim bashkë. Por tek vota ndahemi, e madje ndahemi fort, sepse duam të shkojmë si dy shtete drejt BE.

Mos mendoni se ata që hiqen si nacionalistë, që fshihen pas flamurit kombëtar e që u premtojnë bashkim kombëtar nëpër media e kanë seriozisht. Ata thjesht duan paratë tona e këtë e arrijnë duke na mbajtur peng votën. Ndaj, shihni sa shumë përpiqemi ne në këtë betejë e luftojeni atë në vendin tuaj. Ndryshe do të keni edhe ju ndonjë pushtues vendas. E ndonjëherë janë më të këqij se të huajt.

Dergoi:Matilda Haxhi

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30