Jashari: Grevistët janë të nxitur nga dikush që të mbajnë grevën

nga **Agim Gashi** Fri Jun 17, 2011 10:39 pm

Jashari: Grevistët janë të nxitur nga dikush që të mbajnë grevën

Kuçi: Procedimi i ligjit do të bëhet në fillim të javës së ardhshme

Zëvendëskryeministri Hajredin Kuçi i ka pritur të premten drejtuesit e shoqatave të dalura nga lufta e UÇK-së, të cilët i ka informuar rreth përgatitjes së Ligjit për vlerat e luftës dhe procedimit të tij në fillim të javës së ardhshme në qeveri dhe pastaj në Kuvend.

Gjatë konferencës të mbajtur pas takimit, kishte shumë pyetje nga gazetarët për zëvendëskryeministrin Kuçi, si dhe kryetarin e Shoqatës së Familjeve të Dëshmorëve të UÇK-së, Xhavit Jashari. Por si duket disa anëtarëve të organizatës, nuk u pëlqenin pyetjet e gazetarëve, që i vlerësonin si provokuese.

Nga ana tjetër zëvendëskryeministri, Hajredin Kuçi ka thënë se Qeveria e Republikës së Kosovës vitin e kaluar ka proceduar Ligjin për vlerat e luftës, ligji i cili përfshin edhe familjet e dëshmorëve, invalidëve, veteranëve, viktimat civile dhe personave të pagjetur.

Sipas tij ky ligj është miratuar në Kuvendin e Kosovës në parim apo në lexim të parë, por për shkak të shpërbërjes së Kuvendit është kthyer prapë në qeveri. Duke shtuar se ky ligj ka qenë edhe në strategjinë legjislative dhe është punuar me kujdes dhe në koordinim me shoqatat e dala nga lufta.

Kuçi ka shtuar se është arritur marrëveshje edhe me drejtuesit e këtyre shoqatave, që në fillim të javës së ardhshme të procedohet ligji në Qeveri dhe pastaj në Kuvendin e Kosovës për miratim.

I pyetur nga mediat përse asnjë nga zyrtarët qeveritar nuk ka takuar ish-lufëtarët që janë në grevë, Kuçi sërish ka përsëritur deklaratën e dhënë ditë më parë, se ata i ka takuar kryetar i Kuvendit të Kosovës dhe për të ka qenë e mjaftueshme. Ndërsa ka theksuar se asnjë kërkesë nga grevist nuk ka shkuar në ekzekutivin e vendit për ndonjë takim.

Zëvendëskryeministri ka mohuar që ky ligj po përgatitet nga presioni, duke thënë se ky ligj ka qenë në agjendën legjislative qysh më parë.

Nga ana tjetër, Xhavit Jashari, kryetar i Shoqatës së Familjeve të Dëshmorëve të UÇK-së, ka thënë se ata të cilët nxitin këta persona që të mbajnë grevën, e kanë mundësin që të japin kontributin e tyre në Parlamentin e vendit, por nuk theksoi se kush janë ata.

Ndryshe më shumë se 100 ish-luftëtarë të Ushtrisë Çlirimtare të Kosovës kanë hyrë në ditën e 26 të grevës, duke kërkuar miratimin sa më të shpejtë të Ligjit për vlerat e luftës së UÇK-së.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30