LDK: RTK, zëdhënës i Kryeministrit, Qeverisë dhe PDK-së

nga **Agim Gashi** Tue Aug 23, 2011 10:26 pm

LDK: RTK, zëdhënës i Kryeministrit, Qeverisë dhe PDK-së

Lidhja Demokratike e Kosovës (LDK) reagoi ashpër kundër qasjes së Radio Televizionit të Kosovës (RTK) ndaj saj dhe partive tjera opozitare, si edhe kundër vënies së këtij televizioni publik në shërbim të kryeministrit Hashim Thaçi dhe qeverisë e partisë së tij (PDK).

Nëpërmjet një deklarate publike, LDK i bën thirrje menaxhmentit të RTK-së që të shmangë kontrollin dhe të bëjë punën e transmetuesit publik.

"Radio Televizioni i Kosovës (RTK) vijon të bëjë zëdhënësin e Kryeministrit, të Qeverisë dhe të PDK-së, duke shkelur kështu të gjitha normat e një televizioni publik. RTK-ja, në edicionet qendrore të lajmeve, vijon të konstruktojë informacionin që ka të bëjë me Lidhjen Demokratike të Kosovës (LDK), edhe atëherë kur bëhet fjalë për komunikata që lëshon vetë LDK-ja.

Mbrëmë, në edicionin qendror të lajmeve, RTK-ja, pasi dha njoftimin se LDK-ja ka shpallur zgjedhjet në Degën e Vitisë dhe ka autorizuar Forumin e Rinisë që të shpallë zgjedhjet, duke iu referuar një mediumi privat, konstruktoi një debat për tema që nuk kanë të bëjnë me komunikatën e djeshme të LDK-së, por as me zhvillimet në LDK. Lidhja Demokratike e Kosovës shpreh indinjatën dhe shqetësimin e thellë për veprimet e tilla të RTK-së, në dëm të informimit korrekt të qytetarëve të Kosovës dhe në dëm të LDK-së.

RTK-ja nuk guxon të sillet si kundërshtar politik i LDK-së dhe as i ndonjë subjekti tjetër, ashtu sikur nuk guxon të punojë për Kryeministrin, siç po bën tani. Lidhja Demokratike e Kosovës i bën thirrje RTK-së që të përmbushë misionin që ka, për t'i informuar drejt qytetarët e Kosovës.

Lidhja Demokratike e Kosovës kërkon nga RTK-ja që sillet si një medium publik, si një medium që mbahet e funksionon nga taksat e qytetarëve të Kosovës dhe të mos punojë për interesat e Kryeministrit e të Qeverisë, në dëm të të gjithë të tjerëve. Lidhja Demokratike e Kosovës shpreh shqetësimin e thellë për censurën që kanë vënë Kryeministri dhe Qeveria në Radio Televizionin e Kosovës dhe për shpërdorimin që po i bëjnë këtij mediumi.

Lidhja Demokratike e Kosovës (LDK) i bën thirrje Qeverisë, e cila, këto ditë, po përpiqet ta kalojë një ligj me premisa kundër-kushtetuese për RTK-në, me të cilin synon ta mbajë edhe më tej nën kontroll, që të heqë dorë nga kushtëzimet dhe nga kontrolli në RTK dhe të lejojë këtë medium të bëjë punën e një transmetuesi publik.

Po ashtu, nëse RTK-ja nuk bën përpjekje që të shmangë kontrollin, nëse do të vijojë t'i nënshtrohet Qeverisë e të sillet si kundërshtar politik i opozitës, Lidhja Demokratike e Kosovës (LDK) do të konsiderojë se RTK-ja, me vullnet, është bërë mjet propagande në dorë të Kryeministrit, të Qeverisë dhe të PDK-së dhe se, me vullnet, po e ndihmon Qeverinë që të sillet jo si një pushtet, por si një regjim", thuhet në deklaratën e LDK-së.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30