Emrat që na kanë shpallur luftë

Emrat që na kanë shpallur luftë





Nga Express më 03.04.2009 në ora 16:48

Sot Lëvizja VETËVENDOSJE vendosi 15 pano tri metra të gjata me 117 emrat e njerëzve të cilët “zhvillojnë veprimtari të hapur armiqësore kundër Kosovës e të cilët paguhen dhe kontrollohen nga Beogradi”.

“Përveç nëpër kallëzime penale, emrat e udhëheqësve të strukturave paralele të Serbisë tashmë gjenden edhe nëpër muret e ndërtesave dhe hapësirat publike të kryeqytetit. Aktiviteti politik i këtyre njerëzve ka këto qëllime: ndarjen e brendshme të Kosovë mbi baza etnike; krijimin e autonomisë serbe në vendin tonë; si dhe kthimin e Kosovës nën Serbi”, thuhet në njoftimin e Lëvizjes VETËVENDOSJE.

Sipas këtij njoftimi, kur institucionet politike dhe qeveria nuk i dalin zot vendit për mbrojtjen e tërësisë territoriale dhe konsolidimin e sovranitetit, po bëhen përpjekje që kjo së paku të ndodh nga ana e vetë qytetarëve.

“Aty ku qytetarët mundohen t’i kryejnë punët elementare të pushtetit, kjo do të thotë që pushteti politik ka dështuar në mbrojtjen e interesave themelore të qytetarëve dhe të shoqërisë. Ky është rasti i Kosovës”, thuhet më tej.

Sipas Lëvizjës VETËVENDOSJE, qytetarët e Kosovës kërkojnë ndërmarrjen e masave konkrete kundër njerëzve të cilët punojnë në mënyrë të hapur kundër lirisë sonë.

“Nëse qeveria nuk mund ta bëjë këtë gjë, ngurron apo frikësohet, më mirë le të tregojë. Nëse mundet, le të veprojë. Sepse llafeve dhe premtimeve u ka dalë boja moti”, përfundon njoftimi i Lëvizjës VETËVENDOSJE.