Mentor Thaqi:N´MAJE LISI AI SHKËLQIM PLISI!

nga **Agim Gashi** Tue Sep 20, 2011 9:20 am

Mentor Thaqi:N´MAJE LISI AI SHKËLQIM PLISI!
(Heroit të Kombit – Sefë Kosharja)

Varur n´maje Lisi
... ai shkëlqim Plisi,
vet Lavdia,
e ai Lis i Madh
i vogël se i vogël
të mbajë Legjendë-Kolosi!
Eh,
i rënë
kryengritës,
po frengjitë në varr
ç´të duhen,
kur ti rron
e gjallon,
këmbëkryq
në Oden e Historisë?!
Po po,
Huta le të rri
aty bri varrit,
se myshqeve të moteve
nuk po iu dihet qebesa,
nganjëherë
po dalin jasht Rrugës së Zotit,
e vet arsyeshmëria
po merr lak e kthesa!

Sa Sefë e sa Koshare,
Lavdia s´mund të matet,
s´ka okë, pash as kut,
që përcakton masë,
sa fshehtas e sa ashiqare
shekullit të kthyer krrut
ironia si s´e plasë!

Hë,
po o baca Sefë,
pritat u zunë
andej kah shtegu,
po edhe masat u vunë
andej kah bregu,
e ti as u zbrapse
as u ftohe,
u rrite në përmasa
mbimoti, mbikohe!
Edhe i varur
Lavdia rritet
po edhe i rënë
Jehona s´vritet
dhe, t´kthehemi kah rrënjët,
aty kem burimin,
se kur vijnë mbrëmjet,
Terri sjell trishtimin!

Unë për vete,
t´bëj be në atë Lis,
në atë Plis e nën-Plis,
se helbete
diçka po degdisë,
e keqja teptisë!
Po kah tash na u nis
kjo mjegull rreth Shpisë,
e Shpia nën mjegull
zor të vëj e mbaj rregull?!
Baca Sefë,
pasha k´të Besë
e mendtë e kresë,
jo, Nderi nuk vdes,
se ai gjak yt
bulon çdo ditë,
e Kombit virtyt
në Rilindje dhe Rritë,
në Rikthjellim dhe Bekim
dhe mbrojtje pa rikthim
n´degjenerim,
o Heroi im!

Mentor Thaqi VS., 02-04.09.2011

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30