Vetëvendosje rrëzon maunet serbe

nga **Agim Gashi** Wed Sep 21, 2011 11:34 pm

Vetëvendosje rrëzon maunet serbe

Në shenjë kundërshtimi për “Tregtinë e lirë” ndërmjet Kosovës dhe Serbisë, deputetë dhe aktivistë të Lëvizjes Vetëvendosje të mërkurën në afërsi të fshatit Lupç, në magjistralen Prishtinë-Besianë, kanë ndërmarrë një aksion kundër maunave me mallra të Serbisë, me ç’rast shkarkuan mallin, i cili ishte prodhim i kompanisë “Centro Proizvod” nga Beogradi dhe rrotulluan maunën për ta bërë të palëvizshme.

Vetëvendosje vlerëson se nuk mund të ketë marrëdhënie tregtare me një vend agresor, i cili mban në jetë e në aktivitet struktura kriminale që kanë marrë peng një pjesë të territorit tonë, duke e shndërruar në fole të kontrabandës, krimit të organizuar dhe terrorit për vetë qytetarët e asaj pjese.

“Marrëdhënia e re e gjithsesi shumë e vjetër që po na imponohet, “Tregtia e Lirë” midis nesh dhe Serbisë, vendit që nuk na njeh as të drejtën për të ekzistuar, është e dëmshme dhe e gabuar. Indiferenca e Qeverisë së Kosovës e detyron qytetarin të angazhohet vetë në mbrojtje të mirëqenies së tij, në mbrojtje të konceptit dhe parimeve të së drejtës, që po shkelen në emër të ca normave formale, që edhe kësaj radhe po na imponohen prej të tjerëve, pa marrë parasysh cilat janë nevojat urgjente të atdheut e të popullit tonë”, thuhet në një komunikatë për media të Lëvizjes Vetëvendosje.

Për më tepër, Vetëvendosje konsideron se nuk mund të ketë marrëdhënie tregtare pa pasur marrëdhënie politike dhe bërja e tregtisë së lirë me një vend që nuk pranon të drejtën për qenë shtet, nënkupton të bësh pazar me shtypësin e vjetër.

“Ky lloj i shkëmbimit tregtar e shndërron Kosovën e sotme në një koloni tregtare të Beogradit, koloni moderne që nuk ndryshon shumë prej kolonisë klasike, që ishim dje”, thuhet në komunikatën e Vetëvendosjes, e cila paralajmëron se do të bëjë gjithçka që është e mundur për të parandaluar “Tregtinë e Lirë” me Serbinë.

Ndryshe, pas vendosjes së policëve dhe doganierëve të Kosovës në dy pikat kufitare në veri, Kosova ka hequr masat reciproke ndaj Serbisë, ndërkohë që kjo e fundit vazhdon të mbajë të bllokuar kamionët nga Kosova.

Edhe sot ka vazhduar importi i mallrave nga Serbia me një fluks edhe më të madh. Vetëm sot kanë hyrë afërsisht 150 maune nga Serbia në Kosovë, ndërsa numri i përgjithshëm që nga heqja e masave të reciprocitetit ka arritur në 400.

Nga ana tjetër ministrja e Tregtisë dhe Industrisë, Mimoza Kusari-Lila ka thënë dje se shumë shpejt do të vihen prapë masat e reciprocitetit ndaj Serbisë, sepse siç ka thënë ajo marrëveshja duhet të respektohet nga të dyja palët dhe jo vetëm nga njëra palë.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30