Sabri Hamiti:PËRKUJTIMI I ZONJËS NEKIBE KELMENDI

nga **Agim Gashi** Thu Sep 29, 2011 8:53 pm

Me dhembje të madhe, po ndahemi sot nga gruaja e madhe e Kosovës, zonja Nekibe Kelmendi.
Zonja Nekibe Kelmendi, themeluese dhe drejtuese e lartë e LDK-së, si dhe deputete në të gjitha legjislaturat e Kuvendit të Republikës së Kosovës, i ka përmasat e personalitetit politik rugovian. Kjo nënkupton filozofinë nacionale, politike dhe humane.
Të gjitha këto të synuara dhe të arritura duke u prirë nga pajtimi kombëtar, solidariteti njerëzor, urtësia politike dhe qëndrueshmëria drejt qëllimit: PËR LIRINË, PAVARËSINË DHE DEMOKRACINË E KOSOVËS. Në këtë udhë të vështirë prej dy deceniesh, ajo mbeti si bashkëpunëtore dhe bashkudhëtare e palëkundur e Ibrahim Rugovës. Puna për Kosovën, shkuara e saj dhe mirasi i politikës së saj e bëjnë kaq të ngjashme me Presidentin tonë historik.
Nekibe Kelmendi punoi për pajtimet shqiptare, si kusht themelor për veprimin politik.

Nekibe Kelmendi filozofinë e të drejtave të njeriut, si filozofi universale, punoi për ta bërë vepër në botën shqiptare te Kosovës.
Nekibe Kelmendi punoi për të ndërtuar institucione demokratike si domosdo e mbrojtjes institucionale të barazisë së njerëzve.
Nekibe Kelmendi u bë avokate (mbrojtëse) e të drejtave njerëzore e nacionale të shqiptarëve.

Nekibe Kelmendi u zgjodh me vota të drejtpërdrejta të qytetarëve si përfaqësuese në të gjitha legjislaturat.
Një çift i jashtëzakonshëm, bashkë me burrin e vet, z. Bajram Kelmendin, denoncoi para vendit e para botës gjenocidin serb mbi Kosovën dhe hartoi akuzën kundër Serbisë e Millosheviqit në Hagë. Ky ishte veprim që parashihte hakmarrjen e egër të kundërshtarit, duke parakuptuar flijimin familjar. Burri dhe djemtë e Nekibes u ekzekutuan dhe u flijuan për Kosovën. Kurse zonja Nekibe e Kosovës nuk ra, po qëndroi për të fituar lirinë e vendit të saj.

Ajo punoi me energji të jashtëzakonshme për lirinë dhe pavarësinë e vendit. U bë përfaqësuese ekselente e popullit të vet, legjislatore e pashoqe, duke punuar dhe në hartimin e Kushtetutës së Kosovës së pavaruar.
Nekibja e dinte që dashuria e madhe mbaron në dhembje, që idealet e mëdha paguhen me sakrificë, por ajo nuk hoqi dorë për asnjë moment nga filozofia themelore rugoviane për urtësi, qëndrueshmëri e dinjitet.

Zonja Nekibe Kelmendi ka krijuar një trashëgimi politike e humane që mbetet vlerë për këtë vend dhe për këta qytetarë. Një krue i gjallë për vlera dhe për njerëzit që do të vijnë pas nesh.
Ne jemi edhe të privilegjuar, edhe krenarë që kemi pasur fatin e rastin të bashkëpunojmë me këtë grua e personalitet deri në frymën e saj të fundit, që e kishte dhe që e dha për Kosovën.
Lavdi atyre që jetojnë përgjithmonë! Nekibe Kelmendi do të jetojë përherë në Kosovë e ndër shqiptarë.

(Fjala e Akademik Sabri Hamitit në seancën komemorative të Kuvendit të Kosovës)

Sabri Hamiti:PËRKUJTIMI I ZONJËS NEKIBE KELMENDI 264917_10150209803296451_111076881450_7245022_2582281_n

Sabri Hamiti:PËRKUJTIMI I ZONJËS NEKIBE KELMENDI 264917_10150209803296451_111076881450_7245022_2582281_n

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30