Poezi nga Prend Buzhala

nga **Agim Gashi** Thu Nov 17, 2011 12:55 am

Poezi nga Prend Buzhala

‎*********
E Ti thua se beson!
Hiçju, pash nderën, atyre që flasin
E nuk heshtin në kohën e duhur,
Hiçju edhe atyre që nuk dinë të dëgjojnë,
... Edhe atyre që flasin për Nderin
A për Besimin
Dhe i nxjerrin për çdo ditë jashtë Kanunit,
Jashtë ligjit e jashtë Vetes,
Nëpër Tabela të Shitjes i vënë
E i shesin në Pazar.
I nxjerrin jashtë Atdheut,
I çojnë nëpër gjyqe armike,
Për t’i prangosur më të dashurit e Atdheut.
Nëpër Tryeza nenesh të qoftëlargut i çojnë.
Hiçju gojëçorapëve e shtrembarakëve,
Fjalëbatakëve dhe shpirtherrakëve,
Që jetën tënde ta bëjnë Tabelë për Qitje.
O Zot, e çka nuk vunë në Tabelën e Qitjes?

(Prend Buzhala: POEZI 2003)

=

Mos beso,
Ka shkuar ajo kohë kur njerëzve iu zihej besë.
Çka po të duhet t’i ringjallësh
Dëshpërimet e vjetra e dëshpërimet e reja?
Ka shkuar ajo kohë kur kënaqeshe duke dëgjuar
Rrëfime luftërash të moçme e luftërash të reja
(e çfarë është ajo luftë,
kur nuk ke se çka të tregosh)?
Të pëlqen ai rrëfimtar
Tek e shtrin kallëzimin e tij nëpër plagë
Netëve pranë zjarrit në vatër:
Vetëm ai mundet t’i bashkojë damarët
E burimeve të nëndheshme.
Ai e di se si E Kaluara merr shkëlqim,
Si shfletohet fletë-fletë ajo Histori,
Posi fletëzat e prera holl e holl të drurit
Nën tehun e thikës së mprehtë të mjeshtrit.
Nën tehun e kësaj thike e përbiron Historinë.
Të pëlqen kur të pëshpërit tek veshi:
Për legjendat, shpirtërat dhe vallet,
Për Besën e Konstandinit
E deri te ajo e Motrës së Halilit
Që e preu burrin me kurorë
E fëmijës së saj që i jepte gji
Ia kishte ngulë thikën në trupin e Njomë,
Ndryshe Prerja në Besë nuk lahej.
Çka është Dilema e Hamletit
Përballë kësaj Shpirtbrerjeje arbërore?
Të pëlqen së pari t’i përshkruash të gjitha këto
Në një fletë krejt të bardhë
E mandej t’i mbërthesh
Në një Gjuhë Që Nuk e Ligjëron.

(Prend Buzhala: POEZI 2003)

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30