Thaçi: Mos të përzihet menaxhimi i kufijve me bisedat për kufijtë

nga **Agim Gashi** Thu Nov 17, 2011 2:01 am

Thaçi: Mos të përzihet menaxhimi i kufijve me bisedat për kufijtë

Kryeministri i Kosovës, Hashim Thaçi e ka quajtur të mërkurën qesharake përzierjen e menaxhimit të integruar të kufirit me çështjen e kufijve, përderisa ka kërkuar që të lexohet mirë Ligji për menaxhimin e integruar të kufirit. Ai i bëri këto komente në mbledhjen e Qeverisë së Kosovës, në të cilën kryenegociatorja e Kosovës, Edita Tahiri ka konfirmuar se çështja e menaxhimit të integruar të kufijve do të jetë një prej temave në dialogun ndërmjet Kosovës dhe Serbisë, i cili pritet të fillojë së shpejti.

Thaçi ka thënë me këtë rast se kësaj çështje nuk duhet t’i jepet konotacion në kuptimin politik, siç, sipas tij, i është dhënë ditëve të fundit me deklarata që nuk përkojnë me realitetin.

“Eshtë qesharake të ngatërrohet menaxhimi i integruar i kufirit me biseda për kufij. Vetë fakti se Serbia po e pranon një koncept të tillë të diskutuar prej institucioneve të Kosovës me BE-në dhe SHBA-në, një koncept që është evropian, është njohje jo vetëm e kufirit, por mund të them se është edhe njohje e institucioneve të Republikës së Kosovës nga Serbia”, ka thënë Thaçi.

Ai ka kërkuar nga udhëheqësit e institucioneve që kanë përgjegjësi shtetërore dhe institucionale që në asnjë rrethanë mos t’i ngatërrojnë termat sa i përket çështjes së kufirit, ngase sipas tij, menaxhimi i kufijve është i njëjtë, është model evropian i standardeve dhe kritereve të njëjta me të gjitha vendet fqinje edhe me Shqipërinë, edhe me Maqedoninë, edhe me Malin e Zi, por edhe me Serbinë.
Ndërkaq zëvendëskryeministrja Edita Tahiri ka paralajmëruar se çështja e menaxhimit të integruar të kufirit do të jetë një prej temave të dialogut me Serbinë, i cili pritet të fillojë së shpejti, ky do të bisedohet edhe për bashkëpunimin rajonal, telekomin dhe energjinë.
Tahiri ka thënë se për dallim prej marrëveshjeve që janë arritur deri më tani, për marrëveshjen për menaxhimin e integruar të kufijve, do të kërkohet që të nënshkruhet nga të dyja palët, por edhe nga Bashkimi Evropian.

Për rifillimin e dialogut, Tahiri ka thënë se ka sinjale inkurajuese nga ana e ndërmjetësit të BE-së, Robert Kuper, ndërsa ka shtuar se vazhdimi i dialogut duhet të shoqërohet patjetër me zbatimin e marrëveshjeve të arritura deri më tani, prej të cilave vetëm njëra, ajo për tregtinë e lirë, është duke u zbatuar aktualisht.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30