Rexhep Kasumaj:Në breg udhe!

nga **Agim Gashi** Tue Nov 29, 2011 11:28 am

Rexhep Kasumaj:Në breg udhe!

Le të agojnë malet me sipër plisa bore
Të pamundurën le të kumtojë
Pashtrik i nëmur
Le të blerojnë fushat gjithsajanë
Muzgu le të bie honesh të zemrës prore
Dielli le të ngrohë shpirtëra të përhënur
Le të rrjedhin lumenjtë amshueshëm
tejendanë
Me erën le të përfytet e trishtmja Saharë
Yjtë errësinës pikëllueshëm le të ndrijnë
Le të krenohen akullnajat nëmitjes
së ftohtë
Qirinjë le të digjen dridhshëm në shandan
Le të thurin vashëzat dashurinë
n’mansardë
Shiu le të rigojë lirik a ziplotë
Mbi takimin e së shtunës
Tek bust i menduar në sheshin pranë komunës
Melankolia le të shtjellet mbi një kujtim
të vjetër
Mbi një foto plazhi, mbrëmësor patjetër
Le t’i këndojnë zogjtë përmallshëm ringjalljes
Ndër skamnorë le të pikojë mëshirë
e Nënë Terezës
Fletëverdhat, me mijëra, le të stolisin vdekjen
E bar e lule e flutura le të gëlojnë varrezës
Le të thahen lotët faqesh të Lokës,
rrudhash të trishtimit
Myshkut të pendesës le të rrëzohen Kullat
e ngujimit
Le të venë shtigje me dritë e lodhje tërthor botës
Hëna le të dëshmojë heshtane për natën
e pabesë
Le të vijnë, fundja, ushtritë mbretnore që s’i pres
Perënditë le të smirojnë rropamën e njeriut
A dhimbjen e bukur që s’i qaset Hyut
Hare e harrim le të ftojë pikturë e Degasë
Miqtë këngët e humbjes le të vargojnë
në Parnas
Kapitenët, të gjithë, le të kaptojnë oqeanet me not
Në breg udhe unë seç jam
Dhe në pritje s'jam dot!

R.Kasumaj

Berlin, vjeshtë 1994

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30